Ïaid beit ka jingthep vote ha ki 5 Constituency ha Ri Bhoi, poi tang 56.91% ki nongthep vote

Nongpoh, Rymphang 21: Ki paidbah ha ki san tylli ki Constituency ka Ri Bhoi District ki la ïamih ban pyndep ïa ka jingthep vote na ka bynta ban jied ïa kita ki nongmihkhmat sha ka ïing Dorbar thaw aiñ hapoh ka Khasi Hills Autonomous District Council bad ha kane ka sngi la ïoh lum jingtip ba ka jingthep vote ka la ïaid beit ïaid ryntih ha kaba ki nongthep vote ki la ïoh ban thep vote ne jied ïa kita ki nongmihkhmat kiba ki la bishar ne rai ïa ka mon ba laitluid.
Ki san tylli ki Constituency kiba don ha Ri Bhoi ki kynthup ïa ka Nongpoh Constituency, Jirang, Mawhati, Umsninng bad ka Umroi Constituency.
Ha kane ka sngi, naduh ki riew tymmen, ki samla bad ki longkmie ki longkpa, ki la ïa mih ban poi sha man la ki polling station ban pyndep ïa kata ka hok thep vote jongki, kumba la pynkupbor da ka riti synshar ka ri.
Kum ban pynkynmaw, ha Ri Bhoi District ha ki 5 tylli ki Constituency ki don haduh 331 tylli ki Polling Station bad nadpeng kitei ki 331 tylli ki Polling Station ki don 16 tylli kiba ym don ka jingshngaiñ bad 14 tylli kiba don hapdeng ka jingma, hynrei kumba long haduh mynta wat la ym pat ïoh ïa ka jingkhein ïa ka jingwan poi ki nongthep vote bad ka jingthep vote pat ka la ïaid beit ïaid ryntih.
Ha kane ka sngi, naduh ki kyrtong na ki party bapher bapher ruh ki la leit ban pyndep ban thep ïa ka vote ba kordor jong ki bad ki la don ruh ki kyrtong kiba la ïoh lad ban pynpaw ïa ka jingsngew jongki halor ka jingthep vote.
Kumba la ïoh lum jingtip na ka ophis u Deputy Commissioner ka Ri Bhoi, ka jingwan poi ki nongthep vote mynta ka sngi na kitei ki 5 tylli ki Constituency kiba don ha Ri Bhoi, ka long tang 106571 ngut bad ka poi 56.91% ki nongthep vote tad haduh ba la thoh ïa kane ka khubor.