Khliehriat, Jymmang 31 : Ka jingiakhi da kaba shong kyllaiñ myngngor ha Khliehriat ba la khot pynlong da ka Jaiñtia Coordination Committee on Reservation Policy (JCCRP) jong ki sengbhalang na ri lum Jaiñtia, mynta ka sngi ka la iaid beit ha kaba la wan ban ïa shimbynta lang da ki paidbah, ki waheh shnog bad ki dkhot shnong na ki shnong bapher bapher.
Ha kane ka sngi, ki dkhot jong ka EJNC ki la thang ruh ïa ka dur jong uwei u MLA jong ka TMC uba na Garo, u Dr Mizanur Rahman Kazi u la shu kren laplah khlem pyrkhat, te kum ka dak ka jingpynrem ïa ka jingkren laplah ki dkhot ki la thang ka ka dur jong utei u MLA.
U bah Sambormi Lyngdoh, uba dei u President jong ka East Jaiñtia National Council bad uba bat ruh kum u General Secretary jong ka JCCRP, u la pynpaw ka jingsngew bitar halor ka jingong utei u MLA ka TMC uba la ong ba donkam 50 percent ka bhah thungkam ia ki rilum kiba na kiwei ki jaka bad u ong “Kaei ka jingmut jong utei u MLA ba u la batai ïa ka rukom bhah thungkam kabym sngew iahap, haba ngi mynta ngi dang iakhih ban nang pynheh ïa kane ka bhah thungkam, kumno une u MLA na Garo pat u nud ban pan kum kane ka bhah” ong u bah Sambormi Lyngdoh.
U samla uba na ka shnong Umkiang, u bah Kynjaimon Amse, haba kren ha ka jingialang u la pynpaw ba kane ka bhah thungkam kumba ka long mynta ka long kaba noh shiliang bad ong ba ka dei pynthymmai noh bad dei ban buh beit solonsar 80 percent na ka bynta ki khasi, Jaiñtia bad Garo.
U Assistant Secretary JSM Central Body, u bah Kerbhame Dkhar, u la ther tyngeh ïa ki nongmihkhmat bad ong ba “Lada kane ka jingiakhi jong ka JCCRP kam urlong ngin dang pynlong shuh shuh ïa ki jingiakhih na ka bynta ka shuki jong ki MLA bad leh election biang da kawei namar dang lah ba jied da kiwei ki MLA ban ïa kaba don kine ha Secreteriat, ki bym tip ban kren ïa ki jingeh jong ka jaitbynriew, ki MLA kiba ngi la jied ki la len ïa ngi ha kane ka por, ki dei ruh ki ingkhong shalangmat, kiba ksan rympei rem dorkar, kiba heh nia tang ha ka por ialap election, hato don mo uwei ruh u nongmihkhat na ri lum Jaiñtia u ban mih ban pyrshah ïa kane ka Reservation Policy?, haduh mynta ym pat don bad ruh ngi dawa ïa ka hok kaba katkum ka jingbun paid”.
U Waheh shnong jong ka Narwan, u bah Lamsuk Langstang, u la kren sngewkhia halor ka jingmih ki kynhun kiba pan bhah bad u la kyrpad ïa baroh khamtam ïa ki pnar-jaintia ba kin ieng shwa ha kawei ka lynti ban kyrshan shwa ïa kane ka mat jingdawa jong u bah Ardent Basaiawmoit bad ruh ban buh ha ki jingdwai ban dup ioh ïa ka jingangnud.
Ha kajuh ka por nga phah ïa kane ka khubor sha baroh ki nongmihkhmat ba kin klet noh shawa ïa ka party ba ki don bad ba kin sngewbha ban iasaid lang ban pynbha ïa kane ka Reservation Policy kaba khlem ka jingnoh shiliang, namar lada im ka mynta, ka pateng jong ngi ruh ka im”
