Nongstoiñ, Nailar 14: “Ka kshaid Thupthup ka dei ka kyrteng kaba la jer naduh ki longshuwa man shuwa bad ka jingai kyrteng kumtei, ka dei namar ba katei ka kshaid ka don ar kyrdan kawei kaba sha jrong bad kawei pat kham shapoh. Ka jingnoh jong katei ka kshaid ka long arsien bad ka jingjer kyrteng jong ki longshuwa, ka dei ruh namar ba lada sngap ha ka por mynmiet na shilliang ki lum na shaphang Mawrok lada ka um ka heh bha, ka jingsawa ka long thik kumba lynthem da ki ei kiei ki tiar kiba heh kiba pynmih jingsawa” ong u bah P.Nongsiej uwei na ki rangbah jong ka shnong Mawiangbah.
Katei ka kshaid ka long shisha kaba itynnad bad kaba ithiang bha ban peit ka don ha ka wah Rwiang, kaba jngai kumba saw kilomitar tam na ka jingkieng kaba don ha ka surok bah National Highway 44 (E) Shillong Tura ha ka shnong Rwiang. Katei ka kshaid ka don ha u pud u sam jong ka shnong Mawsiangbah bad ka shnong Mawrok.
Ha ka sngi saitjaiñ ka 13 tarik Nailar ki riew rangbah jong ka shnong Maw-siangbah ryngkat u nongthoh khubor, ki la hiar ban leit peit kai ïa ka jingitynnad jong katei ka kshaid bad haba la poi hajan katei ka jaka, la lap ba ka don kawei ka ïing trep kaba ki briew ki sah miet da ki taïew bad ki bnai. Haba kylli na kitei ki rangbah jong ka shnong Mawsiangbah, ki la ïathuh ba ki nongshong shnong na Mawsiangbah, ki dei kiba wan sah miet ha katei ka jaka, hynrei ha katei ka sngi kim don namar ba ki leit sha kawei ka jingïakop khwai dohkha ha kawei ka jaka.
Ki la ïathuh ruh ba ki nongshong shnong kiba smat bha ban leit tong doh jei na katei ka kshaid, ki tip thik thik ha kano ka por ba ki don jei ki kiew bad haba ka por ka la dei ki leit peit bad haba ki doh jei ki la kiew bun ha ki ranab mawsiang jong katei ka kshaid ki pynap da ka tongsong bad ki sa tong ïa ki. Ha kajuh ka por ki la ong ba kiba ïoh bun ki ju leit die sha sor Nongstoiñ, hynrei kiba ïoh khyndiat pat ki pyndon kam beit tang ban bam ha ïing.
Ha katei ka sngi la pyrshang ban kam sha shiliang jong katei ka wah na kham sha rum jong katei ka kshaid bad la shu lait da ka sait, namar ka jingheh jong ka um bad ka jingkhlaiñ jong ka lat lat. Haba la lait sha shiliang la kiew sha jrong jong katei ka kshaid bad ha marshiteng jong ka mawsiang kaba riat bha, la lap ïa u tyllai u ba jrong bha u ba la teh skhem ha tynrai jong kawei ka dieng.
Haba kylli na kitei ki rangbah ba ka mut aïu ba ki teh ïa utei u tyllai ha tynrai dieng bad ki pynhap pat sha marshiteng katei ka mawsiang, ki la ïathuh ba ki briew ki ba wan tong noh na katei ka jaka ki pyndonkam da utei u tyllai da kaba teh na syngkai bad hiar sha mar shiteng katei ka riat ban tong ïa ki doh jei.
Kitei ki rangbah ki la ong ruh ba kiba smat ban leit tong don na katei ka kshaid ki ju sdang ban leit sah miet ha katei ka jaka naduh u bnai ïaïong haduh u bnai Nailar namar ha kitei ki san bnai ki doh jei kim ju sangeh ban kiew, tangba teng teng ki kiew shisien ha ka shi sngi ha ka por mynmiet, teng teng ki kiew arsien kata mynstep shuwa ban shai bad teng teng wat haduh saw sien shisngi ruh ki kiew. Lada dei ha ka por ba ki kiew bun lei lei ki la shu syrtap ha katei ka mawsiang.
Kitei ki rangbah ki la ong ruh ba wat la katei ka kshaid ka long kaba itynnad haduh katta katta ruh, namar ka jingbym don ka surok kaba biang lane ki lynti ïaid kjat kiba biang ki nong shangkai suwari kim poi satia. Namar ban poi ha katei ka kshaid hap ban ïaid lyngba ki khlaw ki btap bad hiar ïa ki thiep kiba jrong. Nalor kata ki la ong ruh ba lada ka sorkar ka kwah ban kyntiew ïa ki kam jngohkai hapoh ka jylla, ka la dei ban thaw ki lad ki lynti ban pynpoi surok lem shaduh katei ka kshaid namar ka surok kam da jngai than.
