SHILLONG, Nohprah 07: Ka Shillong Lajong FC kan ïakhun pyrshah ïa ka Rajasthan United ha ka jingïalehkai mynta ka sngi jong ka lympung I-League ha ka por 4 shiteng jan miet ha SSA Stadium, Polo.
Ka Lajong ka sngew skhem ban jam sha kane ka jingïakhun ka ban long mynta ka sngi hadien ba ka la ïakhaid da 0-0 pyrshah ïa ki kynhun kaba lamkhmat hakhliehduh jong ka league mynta ka samoi, ka Inter Kashi ha ka jingïakhun ba dang shen.
Na bynta ka Lajong, kane ka dei ka jingïakhun kaba saw sien lynter hala ïing, bad haduh mynta kam pat shym la ïoh seisoh ban khur pura ïa ki lai point, ha kaba ka la ïakhaid da mar 2 kol bad ka Churchill Brothers ha ka jingïakhun kaba nyngkong, nangta rem ha ka Dempo da 2 kol bad ïakhaid dang shen bad ka Inter Kashi.
Hynrei mynta ka kynti, ka Lajong ka khmihlynti ban ïakhun shitom bad khur shalade ïa ki lai point.
Ha kawei pat ka liang, ka Rajasthan United kan kyrmen ban wanphai biang hadien ba ka la mad ïa ka jingshah rem ha ka jingïalehkai ba khatduh jong ki pyrshah ïa ka Sreenidi Deccan FC.
Ha ka jingïalang shuwa ban jam sha ka sngi ïakhun, u Head Coach jong ka Lajong, u Jose Carlos Rodriguez Hevia u la pynpaw ba hadien ka jingïalehkai kaba khatduh pyrshah ïa ka Inter Kashi, u don ka jingkyrmen ban ïoh khur ïa ki lai point kiba nyngkong.
“Ngi kyrmen bad ngi khmihlynti ïa ki 3 point ba nyngkong ha kane ka samoi,” u la ong hadien ba la ïakhaid arsien bad shah rem shi sien ban kamai mynta 2 point na ki 3 tylli ki jingïalehkai. U Coach Jose u kwah ruh ban pyndonkam bha ïa ka kabu ban ïalehkai ha khmat ki nongkyrshan ba shitrhem jong ki ha la ïing.
Katba ka Rajasthan United ka la kamai 3 poiñ na ki 3 tylli ki jingïakhun hadien ba ka la jop shi sien bad shah rem ar sien.
Na bynta ki Tickets lah ban ïoh lyngba ka Electronic Centre (Police Bazaar), Cafe Shillong (Laitumkhrah) bad na SSA Stadium Ticket Counter. Ïa kane ka jingïalehkai yn pyni live ruh ha ka Sony Sports 2 Channel, ka SSEN mobile app & ka ssen.co website.
