Hynriew kynta pakhang surok ki Sengbhalang bad Waheh Shnong bad ki paidbah

Khliehriat, Nailar 08 : Ki nongïalam bad ki dkhot jong ka Khasi Sudent Union (KSU) Narpuh Circle ryngkat ka jingïasnoh kti lang ki Rangbah Shnong jong ka Narpuh lem bad ki paidbah ka thaiñ, mynta ka sngi ki la khang lynti ïa ki kali kiba ïaid na ka surok National highway 6 na Narpuh na ka daw ka jingleh mynthi ka sorkar bad ka national highway authority of India ka bym shym la maramot ïa katei ka surok kaba la jot rathai kaba la buh jingma ïa ki paidbah ba leit ba wan, kane ka jingkhang lynti ka la sdang naduh ka por 10 baje mynstep haduh 4 baje jan miet.
Katba ïa ka jaka lum pisa jong ka NHAI, ka Toll Gate Plaza kaba don ha Lumshnong ki dkhot ka KSU Narpuh bad ki Waheh Shnong ki la khang tala naduh ka por 8 baje mynstep bad ong ruh ba kin ym plie satia ïa katei ka toll gate katba ka NHAI kam pat lah ban maramot ïa ka surok haduh 70 haduh 80 percent ka jingmaramot ïa ka surok.
Haba ïakren bad ki heh sorkar jong ka district, u ADC ka East Jaiñtia Hills District, u bah G.Warjri, MCS kumjuh ruh bad u Manager technical jong ka NHAI, u Biswa Jyoti Lahkar , u nongïalam ka KSU Narpuh, u bah K.S.Suchiang, u la ong ba kane ka jingleh ka sorkar bad ka NHAI ka la long shaba palat, kim suidñiew satia ïa ki jingeh jong ki paidbah kiba leit ba wan na kane ka surok NH-6.
“Na ka liang ka NHAI ka khlem leh eiei ruh ha ka jingmaramot ïa ka surok, te ngi ngin dang ïai bteng beit ban khang tala ïa kane ka toll gate haduh ban da dep maramot ïa ka surok, ka rukom maramot ruh ka long kumba shu theh tang da ka ktieh ha surok,” u la ong.
Utei u nongïalam ka KSU na Narpuh bad u bah Phaibiang Syrti uba kren na ka liang ki Waheh shnong, ki la ong ruh ba kin sa nang iai bud dien bad lada kim leh eiei ïa kane, na ka liang ka seng, ki waheh shnong bad ki paidbah kin mih madan biang ban leh da kaba tyngeh ban pyn pei shkor ïa ka sorkar bad ia ka NHAI.
Kumjuh ruh ka kong Siletmon Phniaw, kaba na Tongseng, ka la pynpaw ka jingsngew khia halor ka jinglong jingman ka surok khamtam ha ka thaiñ Narpuh bad ong ruh ba ïa kane ka Toll Gate ym dei ban plie haduh ban da dep maramot ïa ka surok namar lada plie ïa kane ka toll gate kan long kumjuh hi ha kaba kine ki briew ka NHAI ki kheiñ poh bad kheiñ beiñ haduh katta katta ïa ki paidbah bad paw shai ruh ba kim kheiñ briew satia ïa ki nongshnong shnong ka thaiñ, ka la ong ruh ba ka pisa ba ju lum na ki toll gate hato balei ka NHAI kan lah ban leh ïa ka jingmaramot ïa ka surok, ka la pynpaw ka jingsngew khia khamtam kane ka surok ka buh jingeh ïa ki nongleit nongwan khamtam ki khynnah skul, kumjuh ruh kiba pang ba shitom.
U Manager technical jong ka NHAI, u Biswa Jyoti Lahkar, u kam ba ka jingmaramot ïa ka surok ka dang ïaid bad hadien ba ki paidbah ki la pynphai nia ba ka jingmaramot kam shym la don satia, kumta utei u heh ka NHAI u la kular ba ki nongtrei kin sdang noh ïa ka kam ban maramot ïa ka surok naduh lashai ka sngi bad ruh u la pan por haduh hynriew taiew ban pyndep ïa ki jingdonkam baroh bad ong ruh ba na ka daw ka jingjur slap ki nongtrei kim shym la ioh lad ban maramot ïa ka surok.
Na ka liang u President KSU Narpuh Circle, u bah K.S.Suchiang, ki dkhot ka seng kumjuh ruh ki waheh shnong ka thaiñ ki la ai da kaba tyngeh ba ka jingmaramot ruh kam dei ban long kaba shu trei thulmur tang dep hynrei dei ban da maramot bha da kaba thep da ki maw, ki shyiap bad ki maw kiba rit ba ka surok kan skhem, ym ban shu thep tang da ki maw kiba heh hapoh ki thliew namar kine ki maw ki long pynban ka jingwit bad buh jingma pynban ïa ki kali ba ïaid khamtam ki kali rit.
Ki Waheh Shnong kiba na kiwei kiwei ki shnong ruh kiba la ai jingkren ki la ïathuh ba ka rukom maramot surok ka NHAI ka long ba ki nongtrei ki la shu shim da ki maw ki khyndew na ki par mawshun kiba don hajan bad ki la pyndap ïa ki thliew kiba don ha surok bad kane ka nang buh jingeh shuh shuh pynban namar haba hap u slap ka la jur sa ka jyrsieh kaba da ka khyndew ktieh bad ka surok tang hadien khyndiat kynta ka la long biang kumjuh hi ha kaba ka khyndew bad ki maw ba rit ki la mih sah bar na ka jing hap u slap, kane ka paw shai ba ka jingmaramot ka long tang ban dep rukom bad kaba shu maramot pathar tang ban dep khlem pyrkhat shuh ïa ka jingbit jingbiang ki nongleit nongwan.
Kumjuh ruh na ka liang ki nongleit nongwan kiba na bar jylla, kum na Assam, na Tripura, na Mizoram bad kiwei kiwei ki jylla ba marjan, kiba ju iaid na kane ka surok na East Jaintia Hills District, haba kren sha ki pathai khubor ki la pynpaw ka jinsgngew khia namar ka jingsniew palat ka surok bad ki la ong ruh ba kane ka ktah shisha ym tang ïa ka leit ka wan hynrei ka ktah ruh ïa ka jingitynnad ka jaka bad pyn sniew dur ïa ka jing itynnad ka jylla hi baroh kawei, ym tang katta ki la ong ruh ka ju buh jingeh bha ïa ki ha ka leit ka wan ha kaba man ka por, ki ju ngat ha ka apot shakut dheng kali kaba da ki bun kynta bad kane ka buh jingeh khamtam ïa kito kiba pang ba shitom bad kumjuh ruh ïa kito kiba donkam ban beh ïa ki kam kiba kyrkieh kiba ki hap ban pyndep.
Kum ban shu kynthoh, ka long kaba shisha ba kane ka jinglong jingman ka surok ka la ktah ïa ka jingitynnad ka thaiñ, ka la pynsniew dur shisha ïa ka thaiñ hi baroh kawei, khamtam ki paidbah kiba na ki jylla bapher bapher ki ju iohi bad sakhi ïa ka jinglong jingman ka surok kaba la pynsniew dur ïa ka thain.
Kiba la ai jingkren ki kynthup ruh u Waheh shnong Kuliang, u bah M.Lamare, Waheh Shnong Umstain, u bah Robi Suchiang, waheh Shnong Tongseng, u bah Wanris Suchen, Secretary Shnong Sakhri, u bah Enus Syndor, Ii kong Driwi Tongper ba na Umkiang bad kiwei kiwei.