Jowai, Nailar, 08: Ka Kashari Session Judge jong ka West Jaiñtia Hills District kaba la shong bishar ïa ka Case No.99 of 2015 bad hadien ka jinglap ïa ki sakhi sabut kiba biang, ha ka sngi Thohdieng jong ka taiew ba ladep, ka la rai pynrem ïa lai ngut ki runar kiba don bynta ha ka kam pynïap briew da kaba set phatok shi jingim.
Kine ki lai ngut kiba la shah rai pynrem ki kynthup ïa u Tngen Muruh, u She Muruh bad u Tne Muruh na ka shnong Lumkhudung, West Jaiñtia Hills District. Ka jingshah pynïap ka la jia naduh u snem 1991. Ha ka 16 tarik, Naiwieng, 1991 la mudui ïa ka ejahar ha ki Pulit ka Ummulong Beat House da u Kaïa Muruh uba dei u para jong u Sada Muruh uba la shah pynïap dusmon ha ki 5 ngut ki briew kiba kynthup ïa u Tngen Muruh, u Lowit Muruh, u She Muruh, u Tne Muruh bad u Kamai Muruh kiba dei na ka shnong Lumkhudung.
Ki Pulit jong ka Jowai Police Station ki la register Case hapoh ka Section 302/34 Indian Penal Code (IPC) bad ïa kane ka case la pynkhamti ban tohkit da u SI Q.E. Pala.
Hadien ka jingthohkit, la pynngat kyndon ïa baroh san ngut hapoh ka kyndon U/S 302/34 Indian Penal Code (IPC), hynrei u S.I. Q.E. Pala ula khlad noh ha ka 11.06.2022 khlem pat lah ban pyndep ïa ka Case.
Ki ar ngut kiba la shah pynngat kyndon kiba kynthup ïa u Kamai Muruh bad u Lowit Muruh kine ruh ki la khladnoh katba ka mukotduma ka dang ïaid.
