Shillong, Lber 3 : U Lat ka Jylla Phagu Chauhan mynta ka Sngi Thohdieng, ula khot ïa ka National People’s Party (NPP), kaba don bun paid eh ha ka ïing Dorbar da 26 seat, ba kan thaw ia ka Sorkar thymmai ha Jylla.
“U Lat ka Jylla ula khot ïa ngi (ban thaw sorkar)” ong u Nongïalam ka Parliamentary Party ba dang shu shah jied ka NPP Conrad K Sangma haba ïakren bad ki nongthoh khubor hadien ba ïakynduh ïa u Lat ka Jylla. U Conrad ula aiti ruh ïa ka shithi ïehnohkam kum u Myntri Rangbah ka Jylla ha u Lat.
ïa u Conrad la synran da ki MLA ka NPP, ki 2 ngut, ki MLA ka BJP bah Sanbor Shullai bad Bah AL Hek bad u MLA ka Baghmara Kartush R Marak.
Kumba long mynta ka NPP ka don 32 ngut ki MLA, 26 ngut ki MLA ka NPP, 2 ngut BJP, 2 ngut HSPDP bad 2 ngut ki MLA shimet.
U Conrad u pyntip ba ka NPP kan sa aiti noh ïa ka thup kyrteng jong ki MLA mynta ka janmiet. Kat kum ka jingong jong u, kiba bun ki MLA ka NPP ki dang don ha lynti sha Shillong namar ïa ka result dang shu dep pynbna hynnin ka Sngi Palei.
Shuwa ban leit sha ïing u Lat, ka NPP kala shong ïa ka jingialang Parliamentary Party ha ryngkat ki MLA ka BJP bad u MLA shimet.
U National Vice President ka NPP bah Prestone Tynsong bad MLA ka Pynursla ula pynbna ïa ka rai jong ka Party ba la jied biang ïa u Conrad K Sangma kum u nongialam ka Parliamentary Party (PP).
