45 minit ba shah pynap sha surok ïing u Conrad hap phet ïam rem ki heh HSPDP

Shillong, Lber, 03: Ki nongïalam jong ka Hill State Peoples Democratic Party kiba la shah pynap shabar haduh 45 minit shabar khyrdop jong ka iingsah u National President ka National Peoples Party (NPP) u Conrad K. Sangma ha ka sngi Thohdieng ki la hap ban phet ïam rem katba ki dang thmu ban aiti ïa ka shithi ba ka Party ka la weng ïa ka jingai jingkyrshan ïa ka kynhun jong ka NPP-BJP ban thaw ïa ka Sorkar.
Kane ka pynpaw shai ba u Conrad Sangma um burom satia wat ïa u President jong ka HSPDP bad ïa ki nongïalam jong ka party.
Katkum ka shithi ba la thmu ban aiti sha u Conrad, ka HSPDP ka la pynpaw ba kam shym la aibor ïa ki arngut ki MLA jong ka party, kata u Bah Methodious Dkhar bad u Bah Shakliar Warjri ban ai jingkyrshan na ka bynta ban thaw ïa ka Sorkar katkum ba la paw ha ki lad pathai khubor.
“Ka Party kam don bynta eiei ruh em ha kane ka kam bad namarkata, ngi la weng noh ïa ka jingkyrshan ïa ka party jong phi,” ong ka shithi na ka HSPDP ba la phah sha u Conrad Sangma bad bynrap, ‘sngewbha ban shim khia noh mardor ba ka party ka la weng ïa ka jingkyrshan naduh kane ka 3 tarik, Lber, 2023.”
Hapdeng ka jingbym banse na ka jingshah kynthoh bad ka jingshah beiñ ha ki paidbah, ki nongïalam ka HSPDP ki la leit rah ïa kane ka shithi da ka jingthmu ban aiti ha u Conrad Sangma hynrei la sakhi pynban ba kine ki nongïalam ka HSPDP ki la shah pynap shabar haduh 45 minit watla kiba wan nadien jong ki, ki la rung beit beit shapoh ka ingsah jong u Conrad khlem kano kano ka jingshah pynap shabar.
Da ka jingsngewdukha mynsiem ïa kane ka jingshah leh ibeiñ ki nongïalam jong ka HSPDP hapoh ka jingïalam jong u President u Bah KP Pangniang ki la hap ban shu aiti noh ïa ka shithi ba la weng ïa ka jingkyrshan na ka kynhun NPP-BJP lyngba ka WhatsApp.
U Bah KP Pangniang ha ka jingïakren bad ki lad pathai khubor shabar ka khyrdop jong ka ingsah u Conrad Sangma u la ong, “ngim sngew eiei wat lada ngim ïoh rung shapoh hynrei ngi la shu phah ïa ka shithi lyngba ka WhatsApp. Ïano ïano ruh ngi burom bad na ka liang jong ngi, ngi kwah hi ban ai markhmat.”
Haba kylli, hato na ka liang jong ki arngut ki MLA ki la phah ktien neem sha ka Party, u Bah Pangniang u la ong, “na ka liang jong ki arngut (ki MLA ka party) ki la ai ktien ba kin ïa pynbeit da kaba suk basaiñ hapoh ka party, ban tehsong ïa ki, ban burom ïa ki bad ngim kano kano ka jingpyrshah lada ki don ka jingbakla bad ka kamram jong ngi ka party ka long tang ban shu pynbeit.”
U la ïathuh ruh ba ka jingïakren pynbeit ka long ban don beit bad kino kino ki seng saiñpyrthei hynrei lait noh na ka NPP bad ka BJP. “Mynta ka sngi ka la don ka jingkhot lyngba ka UDP bad kiwei kiwei ki party bad hynne na ka liang ka party ngi la don ka jingïapynbeit hynrei ngi sngew kyndit ban ïohi ha ki lad pathai khubor ba ki arngut ki MLA jong ka party ki la ai ïa ka jingkyrshan shimet jong ki ïa ka NPP. Ngi don ki kyndon treikam jong ka party, lada dei ba ngin ai jingkyrshan hadien ba ngi la shai bad ngin da lah mynjur lang da ka party ngin hap ban da phah da ka jingthoh. Haoid, ka lah ban long ka jingbakla kyrkieh ka jong ki bad na ka liang jong ngi, ngim banse ban hap thoh da ka party baroh kawei ban weng shwa ïa kane ka jingai jingkyrshan (ïa ka NPP) bad ngi kwah ruh ba ma ki (arngut ki MLA) kin da wan ïa pynbeit shwa,” ong shuh shuh u Bah Pangniang.