Hiar kyrpang ka KSU ban pynkup burom ïa u halor ka jingïohpdiang Padma Shri Award 2026

Shillong, Jylliew 3: Ka Khasi Students’ Union lyngba ka Environment Cell, Central Executive Council lem bad ki dkhot ka Sohra Circle ka la ïoh ban leit kynduh, ban ai khublei bad ban pynkup burom kyrpang ïa u bah Hally War u nongïoh pdiang ïa ka Padma Shri Award 2026, ha ïing sah jong u kaba don ha Shnong Siej, Nongkhroh Sirdarship.
Kane ka jingleit ban pynkup ba 70 snem duna, u la pynpaw ruh ba ka jingtei jong u ïa kane ka jingkieng mynnyngkong kam dei eh ban khring ïa ki nongkhmih kai pyrthei (Tourist) hynrei u la tei khnang ban suk ka leit ka wan haba leit Bri leit lyngkha khamtam jong ki longdien ki mandien, namar ba mynnyngkong ha kane ka jaka la shu pun jingkieng tang da ki siej bad ki dieng tylli, u la ong ba um shym poi pyrkhat ba kan kylla long pynban ka wei na ki jaka jngohkai pyrthei, ïa kaba kam dei shuh tang ban pynsuk ka leit wan haba ba leit bri, hynrei ka la ai lad ban kamai jakpoh wat ïa ka shnong ka thaw ruh kumjuh, khamtam lei hadien ba la wan jngoh ïa kane ka jingkieng da ka myntri Sorkar Pdeng, ki myntri Sorkar jylla, bad ruh u la ïoh pdiang ïa kane ka khusnam, u la ïathuh ba ki nongjngohkai ruh ki la khambun.
U ne u rangbah u la pynkynmaw ruh ba kum ka jaitbynriew khamtam ki samla ba ki dei ban ieit, ban pynneh pynsah, ban bteng ruh ïa kaei kaba ki longshwa manshwa ki la ai, u la pynkynmaw ruh ïa ki samla jong ka jaitbynriew haba ki leh ïa kano kano ka kam la kaba rit ne kaba khraw, leh da ka jingieit, jingminot bad jingaiti lut ha ka kam namar da kaba leh kumta shisien ka sngi kin sa ïoh kheit ïa u soh jong ka jingjop.