Shillong, Naitung 25: Ki Pulit ka jylla ka la hiar sha Assam ha kine ki khyndiat sngi baladep ban leit thwet ïa ki briew kiba donkti ha ka jingïakhaïi beaiñ ïa u dewïong na Meghalaya sha Assam.
U Director General of Police, u Dr.LR Bishnoi, u la ïathuh ba hadien ka jingbhah jong ka High Court of Meghalaya, ki Pulit Meghalaya ki la ïatreilang bad ki Pulit ka Assam, namar ba kine ki briew kidei kiba sah sha Assam. Ryngkat ka jingïatreilang bad ki Pulit Assam la pynlong ka jingleit khynra ha ki katto katne ki jaka ba suba ba kine ki briew ki shong, hynrei ym shym la lap satia ïa ki namar ba ki la phetrieh. U la ong ba na ka liang ki Pulit ka jylla kin nym shongthait satia tad haduh ban da ïoh kem ïa kine ki briew kiba dei ki “Kingpin” jong ka kam khaïi dewïong beaiñ na Meghalaya ha kaba ki kyrteng ruh ki la ïoh.
