Bat ka Seng JNC ïa ki kali kit ñiut jong ka Company Dalmia ba pynkheiñ ïa ki Kyndon

Khliehriat, Naitung 25: Ki dkhot jong ka Jaiñtia National Council, mynta ka sngi ki la ïoh bat ïa ki phra tylli ki kali kit ñiut jong ka company dewbilat Dalmia, Thangskai East Jaiñtia Hills District, kiba la pynkheiñ ïa ki kyndon aiñ, ïa kitei ki kali la ioh bat ha Mookhep katba ki dang wan na Shillong ryngkat bad ki ñiut ba ki la kit na ka jaka theh ñiut na Marten, Shillong.
Hadien ba la bat ïa kitei ki kali, ki dkhot ka JNC hapoh ka jingïalam u President u bah Sambormi Lyngdoh lem bad u Environment Secretary, u bah Nini Sungoh ki la hiar sha company Dalmia Cement Ltd ha Thangskai bad la ïoh ban iakren bad ki heh jong ka company, ha ka jingiakren bad ha ka jingbishar ïa ki kot ki sla kiba dei ki kyndon (Guideline), ka JNC ka la lap shuh shuh sa ïa kiwei kiwei ruh ki kyndon ba katei ka company ka la pynkeiñ, ha kaba kam shym la lah ban ai ka jingiada kaba paka ïa ki nongñiah kali kiba kit ïa ki ñiut kiba sma iwtung haduh katta katta.
La lap ruh ba ka um kaba jaw na ki kali kit ñuit ka long kaba sma iwtung haduh katta katta, na ka liang ki dkhot ki la sngew khia ba kane ka jingsma ka lah ban ktah ïa ka koit ka khiah jong ki paidbah bad ïa kiba ñiah kali ruh kumjuh bad ong ruh ba kane ka hap ruh ha ka jingpynkheiñ ïa ki kyndon aiñ iada mariang.
“Lada jia ba don ka jingdheng kali ha lynti, kane ka jingsma iew tung bad ka um kaba jaw na ki kali kit ñiut kan ktah ïa ka koit ka khiah jong ki paidbah, namar kane ka pynjakhlia ïa ka mariang bad kumjuh ruh ïa ka lyer”ong u bah Sambormi Lyngdoh.
Ha ka jingïakren bad ki nongïalam ka seng, ki heh jong ka company Dalmia ba kynthup u Plant HR Head Dalmia, u Dinesh Kr. Bhardwaij, u Head Technical Plant, u Vinod Kumar Singh bad ki nongtrei jong ka Dalmia, ki la kubur ïa ka jingpynkheiñ aiñ jong ki ha kaba ïadei bad ka jingthep ïa ki ñiut ha ki kali bad ha kajuh ka por ki la kular ba nangne shakhmat kin sa shim khia ban bud pyrkhing ïa ki kyndon kiba katkum ka Guideline ban ïada ïa ka mariang bad kumjuh ruh ban nym kath ïa ka koit ka khiah jong ki paidbah, ki la ong ruh ba kin sa bthah ïa ki ba ñiah kali kit ñiut ba ki dei ban da siang bad tap bha ïa ki ñiut khnang ba kan nym mih ka jingsma iwtung bad ba kan nym jaw ka um ba sma iwtung.
Kitei ki heh jong ka company Dalmia, ki la ong ba ïa ki ñiut la wanrah ym tang na Shillong, hynrei naduh Guahati ruh la wanrah ïa ki ñiut bad ki la ong ruh ba ïa ki ñiut la dep ban phiah ha ki ar bynta (waste segregation) kata kiba pyut bad kito ki bym pyut, hynrei katkum ka jinglap ki dkhot ka JNC la lap ba ïa ki niut la shu thep lomsom hapoh ki kali kit ñiut ryngkat ka lyer kaba sma kaba iew tung haduh katta katta kaba mih na kitei ki kali kit ñiut, kaba beh ïa ka jingsma wat sha kito ki kali kiba bud nadien jong ki.
Na ka liang ka seng, ka la buh ruh ka jingkylli ïa ki heh jong ka company Dalmia ba balei kim lah ban shim lem ïa ki ñiut kiba na Jowai bad na East Jaiñtia Hills District ruh ban rah sha company ban thang katba ïa ki ñiut kiba naduh Shillong, na Guahati pat ki lah ban wanrah sha company “Ka East Jaiñtia Hills District kan jin da la long shisha ka district kaba khuid lada ki company kin shim khia ban lum ïa ki ñiut na ki shnong ki thaw bad na ki jaka ïew” pynpaw ki dkhot ka JNC.
Ha kajuh ka por, uwei na ki nongialam ka JNC, u bah Mehi Rymbai, u la ong ba ka seng kan sa nang ïai bud dien ïa kane bad lada lap ba ki kali kit ñiut ki dang leh pathar ïa ki ñiut khlem tap bha ba lada dang mih ka jingsma iwtung bad lada lap ba ka company ka dang pynkheiñ ïa ki kyndon aiñ, ka seng kan sa shim da kawei ka lynti kaba kham tyngeh.