Jowai, Naitung 25: Ka Dorbar Elaka, jongka Elaka Raliang kaba la long ha kane ka 24 tarik hapoh ka Dorbar Hall jongka Shnong Raliang, da kawei ka sur kala rai ban pynneh pynsah ïaka mei mariang jong ka sawdong sawkun bad ban wanrah ïa ka shongsuk shongsiañ hapoh ka Elaka ha kine ki sngi ban wan.
Ha kane ka sngi la wan ban ïadonlang naduh ki Waheh Shnong, ki riew rangbhah, ki samla bad ki longkmie, na ki Shnong bapher bapher hapoh ka Elaka. Ïa kane ka Dorbar la pynïaid da u Pa Daloi u ma C. Lyngdoh uba long ruh u Chairman jong ka Dorbar Elaka. Ha kane Dorbar da kawei ka Sur kala shim kine ki rai harum.
Ka Dorbar Elaka kala rai ban khang pyrshah ha baroh kawei ka Elaka ba ym bit satia ban thang lum/thang khlaw mamar ka pynduh jait ïaki jingthung bad kiwei pat ki jingthaw ba im. Ym bit satia ba siat lane pynïap ïa ki Sim ki Doh bad ki Mrad ki Mreng baroh. La rai ban ïatreilang bad ka Tnad Forest khnang bad dup lah ban teh lakam ïa kiba ïaleh pyrshah.
Ha kaba ïadei pat bad ka Shongsuk shongsaiñ hapoh ka Elaka, khamtam ha ka por Election, na ka liang ka Dorbar Elaka kala shim ïaka sienjam kaba bha tam kumne harum.
Lakhang pyrshah ïa ki Candidate ba ïaleh Election (MDC/MLA/MP) ban wan ïalap Election ha ka por Election sha baroh ki shong hapoh ka Elaka palat ïaka 4-tylli ki Kali rit kumba la ai jingbit daka Election Commission, lait noh tang haka Rally.
La khang pyrshah ïa ki Candidate ba kim bit satia ban ai Ja lane kino kino ki jingdih pynbuaid lalit naka Sha, ïa ki paidbah ha ka por baki wan ïalap Election, haka por Election.
Ban pynskhem bad pynrking bha ïa kine ki rai ba la shim ka Dorbar Elaka ka Kyrpad bad btah ïaki Dorbar Shong bapher bapher ban pynbna Shnong shisyndon ïa kine ki rai ka Dorbar Elaka bad ban ai ka jingïatreilang na naka bynta ka jingbha bad ka jingmyntoi jong ka Elaka baroh kawei. Kane ka long katkum ka jingpynlait khubor na ka ma Rikut N Parien, Secretary Dorbar Elaka Elaka Raliang.
