Jowai, Naitung 25: Ka Orphan Children Foundation Jaiñtia Hills, ha kane ka 24.07.2023, hapoh ka jingïalam jong u Founder Chairman u bah L. Dkhar ka la ïarap sngewbha da ka bai skul kaba 3 bnai bad ki marbam sha ki khynnah khunswet bad kiba don ka jingduna ha ki dkhot met kiba don hapoh jong ka Shnong Priang West Jaiñtia Hills District.
Ha kane ka sngi la pynïaid ïa ka jingïalang kaba rit da ka kong M. Bareh Office Secretary Orphan Children Foundation West Jaiñtia Hills la ïoh ruh ka jingkren lyngkot na u Waheh Shnong ka Shnong Priang West Jaiñtia Hills ma K. Chullet, uba la ai ka jingïaroh bad ai khublei ïa ki nongïalam ka Orphan Children Foundation kiba la lah ban poi hapoh jong ka Shnong ban ai jingïarap ïa kum kine ki khynnah ba donkam shisha ïa ka jingïarap.
U Founder Chairman ka Orphan Children Foundation Jaiñtia Hills u bah L. Dkhar haba kren ula ong ba ka Orphan Children Foundation ka lah ban trei kam ha baroh ki bynta jong ka Ri-Lum Jaiñtia khamtam sha ki thaiñ nongkyndong bad ula ong ruh ka thong kaba hakhmat eh jong ka Orphan Children Foundation ka long ban pynlong tara jur ïa ki khynnah, lada long ki khynnah khunswet khun riewspah bad khun baduk ki dei ban ïoh kajuh ka jingieid kumba kiwei ki khynnah ki ïoh bad ym dei ban ñiew shiliang ïa ki bad ula ai mynsiem ruh ïa ki wat lada kim don kmie don kpa ki duna ha ki dkhot met ruh hynrei ki dei ban ïai minot ha ka jingpule puthi khnang ba kin poi sha khmat kum kiwei ki khynnah.
Shuh shuh ula kyntu ruh ïa u Waheh Shnong ban sngewbha ban ïatrei lang bad ka OCF khnang ba kin nang ïai lah ban bteng ïa ka jingïarap. Ha kane hi ka juh sngi la ïoh ruh ban ïarap ïa ki khunswet bad kiba duna dkhot met ha ka Shnong Iooksi Umdeinlin, ha jingïadonlang ki volunteer jong ka OCF West Jaiñtia Hills u D. Bareh bad ka kong M. Lyngdoh.
