Hiar ki nongïalam VPP sha Ri Bhoi ban pynshai paidbah ïa ka nongrim ka seng

Nongpoh, Jymmang 20: Kumba ka sur jong u Prah kaba dei ka shap jong ka party VPP ka dang sawa jur ha kylleng ka ri lum Khasi Jaintia bad ha ka jylla wat hadien ba la kut ka election MLA hapoh ka jylla, ki nongïalam ka party VPP kim shem la shong thiah thai, hynrei ki la hiar mynta ka sngi sha Ri Bhoi ban pynlong ïa ka jingïalang ha Nongpoh na ka bynta ban pynshai halor ka nongrim jong ka party kaba thrang ban wan rah kata ka jingkylla hapoh ka jylla.
Kaei kaba ai mynsiem ïa ki nongïalam ka VPP ha ka jingïalam u Bah Ardent Miller Basaïawmoit kum u President bad ryngkat ka jingdon lang u General Secretary, u Dr. Ricky Syngkon bad kiwei ki nongïalam, ka dei ka jingkloi hi ki paidbah ban pynïasoh noh sha kane ka party kaba dei hadien ba u nongïalam ba rangbah u la pynshai sha ki paidbah halor ka nongrim bad ka jingangnud ka party VPP ban shakri na ka bynta ki paidbah hapoh ka jylla.
Ïa kane ka jinglang la pynlong ha ïing Dorbar Hall, Sajer Nongpoh, ha kaba u Bah Ardent Miller Basaïawmoit kum u President u la wan hi da lade ym tang ban pynshai ïa ki nongrim treikam ka party, hynrei u la shim ruh ka bynta ban pynrung dkhot ïa ki paidbah kiba la wan ban pynïasoh sha ka party VPP da ka jingkylluid mynsiem.
Lyngba jong kane ka jingïalang ba la pynlong da ka VPP ha Nongpoh, la sakhi bad iohi ba kam don kano kano ka jingpynbor na ka liang ka party ba kin wan ban pynïasoh sha ka party VPP, hynrei ki paidbah hi da ka jingkylluid mynsiem bad ka jingshaniah ïa kane ka party ba kan trei borbah na ka bynta ka jingkylla hapoh ka jylla ki la wan ban pynïasoh sha ka party da ki spah ngut da kaba ki la thep kyrteng lyngba ka kot ban pynthikna ba ki la dei ki dkhot ne ki nongïalam ba pura jong ka party VPP.
Na ka liang u Bah Ardent Miller Basaïawmoit kum u President ka VPP party u la pynpaw ïa ka jingsngewkmen ba ki paidbah kat dang mih ki sngi ki la wan ban ai ka jingkyrshan ïa ka party VPP ha kaba kam dei na kano kano ka daw bad ka daw kaba hakhmat eh ka dei ba ki la sngewthuh ïa ka nongrim jong ka party bad kaei kaba la leh da ka party kaba ïa khun ïaka hok jong ki paradoh ki para snam hapoh ka jylla.
U la bynrap ruh da kaba ong ba ka party VPP kan sa leit kylleng ki jaka jong ka ri Khasi-Jaintia ban ïalap halor ka nongrim treikam ka party bad kumba long hi haduh kine ki sngi kat shaba ka party ka leit ki paidbah ki kloi ban ai ka jingkyrshan na ka daw ba ki sngewthuh dei tang kane ka party kaba ieng shisha ban ïaleh na ka bynta ka eh ka shong bad ka hok jong ka jaid bynriew, u la bynrap.
Namarkata, na ka liang u Bah Ardent Miller Basaïawmoit kum u nongïalam kane ka party u la kyntu ruh ïa ki paidbah ba kim dei ban shah ïalam bakla la ka long ha ka bor jong ka pisa ne ha kiwei kiwei ki kam ba ki shah pynbiej, hynrei kum kita ki nongshong shnong ki dei ban long kita kiba stad ban jied ïa ki nongmihkhmat namar dei tang lada u paidbah u stad ban jied ngi lah ban wan rah kata ka jingkylla hapoh ka jylla, u la bynrap shuh shuh.