Kular ka kong Santa Mary ban shim khia ha kaba iadei bad ka surok NH-6 kumjuh ruh ki PHC ha Narpuh

Khliehriat jymmang 20: Ka MLA jong ka Sutnga Saipung Constituency, ka kong Santa Mary Shylla ka la kular ba kan sa shim khia ban pynsngew sha ki bor kiba halor, ha kaba iadei bad ka jinglong jingman ka surok national highway-6, ha Narpuh, East Jaiñtia Hills District bad kumjuh ruh ban pynbit pynbiang bha ia ka PHC kaba don ha Umkiang bad ha Lumshnong na ka bynta ka jingbit jingbiang ki paidbah ka thaiñ.
Dang myn ha kine ki khyndiat sngi, katei ka nongmihkhmat, ha ryngkat ka jingsynran lang ki Waheh Shnong jong, ka shnong Umkiang, Pyrtakuna, Lumshnong lem bad ki heh sorkar na ophis u Deputy Commissioner, ka la leit ban jurip ia ka surok national highway ha Narpuh bad ka la jurip ruh ia ka PHC ha Umkiang bad ha Lumshnong, ka la pynpaw ka jingsngew khia halor ka jingbym bit bym biang bha ka surok national highway kaba dap da ki thliew ki syar bad don bun ki bynta jong ka surok ruh kiba la jot la julor, ka la bthah ia ki nongtrei jong ka NHAI ba ki dei ban maramot noh mardor ia ka surok khnang ba kan nym buh jingeh ia ki paidbah kiba leit ba wan kiba dei iaid lyngba na kane ka surok NH-6 na East Jaiñtia Hills District, ka la buh ruh da ka jingmaham kaba tyngeh ba lada ka NHAI kam lah ban leh ia ka jingmaramot, ka kum ka nongmihkhmat kan sa rah ia kane ka mat sha ki bor kiba halor.
Ka kong Santa, ka iakren ruh bad ki Waheh Shnong ha kaba iadei bad ki PHC kiba dei ki jaka ai jingsumar ia kiba pang ba shitom ha ka thaiñ bad ong ba na ka liang jong ka kan sa rah ia kane ka mat sha ki bor ba halor khnnag ba kine ki PHC ki long kiba bit ba biang bha na ka bynta ka jingmyntoi jong ki paidbah.