Hiar jurip u MLA ka Mawkyrwat ïa ka jingpynsah teng u kontraktor ïa ka jingkieng

Mawkyrwat, Nohprah 22: U nongmihkhmat jong ka Mawkyrwat Constituency, u bah Renikton Lyngdoh Tongkhar u la leit hiar jurip kyndit ïa ka jingkieng ïaid kali kaba dei ban pynïasnoh na ka shnong Sohma sha ka shnong Jashiar, South West Khasi Hills District kaba kam lyngba ïa ka wah Rilang.
Haba kren ha ki lad pathai khubor, u bah Renikton u la pynpaw ka jingsngewkhia ha kaba ïa dei bad kane ka jingkieng da kaba u la ong ba kane ka jingkieng ka dei kaba donkam eh katta katta ïa u paidbah jong ka dong ka thaiñ ba kin ïoh ïaid noh na kane ka jingkieng, hynrei kumba long mynta kane ka jingkieng ka dang don tang shiliang u païa katba shiliang yn pat leh ei ei. “Ïa kane ka jingkieng la mang tyngka na ka World Bank ban pyntrei kaba long T. 4 klur shiteng”, ïathuh u bah Renikton.
Ha kane ka jingjurip, u bah Renikton u la kyntu ïa u kontraktor u ba pyntrei ïa kane ka jingkieng na Sohma sha Jashiar ba un sngewbha ban pyntrei noh kham kloi lane ban sdang noh biang ïa ka jingtrei ba ymdei ban pynsah kut noh kumne namar ka aïom ruh ka dei ka aïom ban trei. “Shwa ban wan ka lyiur la kumno kumno kane ka jingkieng ka la dei ban dep noh”, kyntu u bah Renikton ïa u kontraktor.