Shillong, Nohprah 22 : U Bah Process T Sawkmie, MLA barim ha ka 22 tarik u Nohprah, 2023 u la rakhe advance Khristmas bad ki nongshong shnong ka Umpling Umjathang, kyrpang ryngkat kiba duk, ba tymmen bad baduna dkhot met ba la pynlong ha iing shnong jong ka Umpling Umjathang.
Haba ai jingkren hadien ba la dep ai Christmas Gift ne jingai sngewbha na ka bynta ban lehkmen Khristmas da ki blanket, u bah Sawkmie u la pynpaw ïa ka jingkmen ban ioh rakhe Khristmas ryngkat kiba duk, ki tymmen ki kro bad ki baduna dkhot met kiba na Umpling Umjathang.
U ong, ba ka Khristmas ka dei kata, haba iohi ïa ki marjan marpa ba ki pang ki shitom bad ba ki don hapdeng ka jingeh, ka dei ka bynta jong ngi ban don bynta lang ban ïarap lem ïa ki bad ban ym long tang ki nongpeitkai, hynrei ban don ïa ka mynsiem Khristan ban ïarap ïa ki bad ïa kiba don kum kane ka mynsiem sngewsynei, U Blei ruh u tip kham bha ban kyrkhu ïa ki.
Namar ngi shakri ïa U Blei Ba im, uba la kha sha kane ka pyrthei ban pynim ïa ki nongpop, bynrap u bah Sawkmie.
Ha kane ka sngi la ioh ruh ïa ka jingkren na kawei ka longkmie, kaba kyrteng ka kong S. Langstieh kaba la pynpaw ïa ka jingsngewnguh ïa u MLA barim, watla um long eiei shuh, hynrei u dang ïai pyrshang ban ai eiei kum ka jingai sngewbha Khristmas sha ki.
Kiwei ruh kiba la ai jingkren kum u Bah K. Kharumlong, rangbah dong Umpling Umjathang, bah K. Lyngdoh, bah Kynsai Nongphud ba pynïaid ïa ka jingïalang ki ruh ki la pynpaw ïa ka jingsngewkmen halor ka jingkynmaw kyrpang jong u MLA barim ïa ki nongshong shnong jong ki.
