Hiar jurip u Kartikeya Misra halor ka ‘Viskit Bharat Sankalp Yatra’

Nongstoiñ, Naiwieng 17: Kum shi bynta jong ka ‘Viskit Bharat Sankalp Yatra’, ka prokram kaba lah dep ban plie bad pyntreikam ha ka 15 tarik Naiwieng 2023 da u Myntri Rangbahduh ka Ri India, u Narendra Modi, ha ka sngi palei pat u Kartikeya Misra, Director DFS, Ministry of Finance jong ka Sorkar India, u ophisar u ba dei khmih na ka bynta ka West Khasi Hills District, u la hiar sha Nongstoiñ bad pynlong ïa ka jingïalang ha Conference Hall ka Ophis.
Ha ka jingïalang la donlang ruh u Deputy Commissioner West Khasi Hills District, u Bah Garod L.S.N Dykes I.A.S, lem bad kiwei pat ki heh sorkar jong ka District na ka bynta ban pynsngewthuh halor ka thong bad jingmut jong kane ka ‘Viskit Bharat Sankalp Yatra’ prokram.
U Kartikeya Misra, u la pyntip bad pynshai ba ka thong bad ka jingmut jong kane ka prokram ka long ban pynshai paidbah, ban pyntip sha ki paidbah shaphang ki skhim sorkar kiba pher bad ki jingmyntoi lyngba kita ki skhim, kiba la pyntreikam da ka Sorkar India na ka bynta ki nongshong shnong bad ban pyntikna ruh ba ki skhim ki dei ban poi sha kiba dei hok ban ïoh.
Une u heh ophisar ka sorkar pdeng, u la ong ba ka ka kamram jong ka bor synshar District na ka bynta katei ka prokram, ka long ba ki dei ban leit sha ki paidbah nongshong shnong bad ban pynshai halor kane ka prokram, khnang ban ym don uwei ruh u ban duh ïa ki jingmyntoi lyngba ki skhim sorkar kiba pher bapher kiba ka Sorkar India ka la dep ban pyntreikam kyrpang na ka bynta ki nongshong shnong ka Ri India.
U Deputy Commissioner bad ki ophisar kiba la ïadon ryngkatlang ha katei ka jingïalang, ki la pynpaw ïa ka jingkmen halor kane ka prokram bad ki la mynjur ruh ban trei shitrhem ban pynlong ïa kane ka ‘Viskit Bharat Sankalp Yatra’ prokram, ka prokram kaba jop bad kaba myntoi na bynta ki nongshong shnong jong ka thaiñ West Khasi Hills District hi baroh kawei.