Nongstoiñ, Naiwieng 17: Ka jingmaramot bad pynbha ïa ka surok na Mawrang shaduh Rambrai bah, kaba pynïasoh bad ka surok PMGSY Rambrai sha Mawrok kaba jngai tang kumba 2.5 kilomitar, ka la ïaid shait shait mynta bad satang katto katne bnai yn sa lah ban pyndep noh.
Ha kaba ïadei bad ka jingpynbha bad maramot ïa katei ka surok, u bah Kimfa S Marbañiang MLA barim bad u bah bajop Pyngrope MDC ba mynta, haba ïakren bad u nongthoh khubor mynta ka sngi ha katei ka jaka, ki la pynpaw ka jingsngew kmen kaba khraw bad ki la ai khublei kyrpang ïa ka sorkar MDA bad u bah Prestone Tynsong Symbud Myntri Ranabah ka jylla, u ba long ruh ha kajuh ka por u Myntri ba dei peit ïa ka tnad PWD, u ba la sngew la sngap ïa ka jingkyrpad jong ki ba un ïarap lem bad mang pisa haduh 2,24,95,200 na ka bynta ban pynbha bad siangrong ïa katei ka surok kaba la jot rathai la slem bah.
U bah Bajop Pyngrope u la bynrap shuh shuh ba ka Rambrai Jyrngam Constituency, ka dei kawei na ki konstiwensi kiba dang sahdien bha ha ki kam pynroi, khamtam eh ha ki surok bad ki lynti ki syngkieng. Hynrei naduh ba u la leit ban pynïasoh bad ka NPP u kyrmen ba na ka liang ka sorkar kan sngap ïa ka jingud jingnam jong ki kum ki nongmihkhmat bad ruh ïa ka jingkyrpad ki paitbah.
Haba kylli pat ha kaba ïadei bad ka surok two lane na Nongstoiñ Rambrai haduh Kyrshai, u bah Bajop u la ong ba dang shen u la leit ban ïakynduh ïa u heh duh jong ka NHIDCL, u ba dei peit ïa ka jingpyntrei ïa katei ka surok ban pynsngew ruh ha u ba ka la dei ka por ban thawlad ban sdang noh ban bteng sa ia ka bynta ka ba ar naduh Mawthir shaduh Kyrshai.
U bah Bajop u la ong ba utei u heh ka NHIDCL u la ong ba ka jingpynkhreh ïa ka DPR mynta ka dang ïaid shaid shaid, hynrei ym tip pat haduh lano yn lah ban pynbit pynbiang ha ka rukom kaba dei. Haba kylli pat ha kaba ïadei bad ka jingpyntreikam pura ïa ka Block ophis kaba la dep plie ha u snem ba la dep, na ka liang u bah Kimfa S.Marbañiang u la ong ba ka jingpynkhreh jong ka sorkar ban mang pisa na ka bynta ban tei ïa ka Block ophis kaba pura ka dang ïaid shakhmat bad ynda ka sorkar ka la dep ban mang pisa kan sa tei ïa ka ophis ba pura jong ka Rambrai C&RD Block.
Haba kylli pat ba la dep don ne em ka jaka na ka bynta ban tei ïa katei ka Block, u bah Kimfa u la ong ba ki don ki trai khyndew kiba la tyrwa ban ai sngewbha ïa ka jaka ban tei ïa katei ka Block ophis. Hynrei na ka daw jong ka jingbym pat lah jong ka sorkar ban mang pisa, katei ka kam ka dang sah teng bad yn sa ïapeit pat kham hadien, ynda ka sorkar ka la pyllait ïa ka mang pisa na ka bynta ban tei ïa katei ka Block ophis.
