Hiar jurip ka Dr. Ampareen ïa ka Cancer Wing ka Civil Hospital

Bun tam kiba pang cancer ha East Khasi Hills

0

Shillong, Lber 15: Ka Myntri jong ka tnat ka koit ka khiah ka sorkar jylla ka Dr. Ampareen Lyngdoh ha ka sngi Balang ka la leit ban jurip ïa ka jaka sumar ïa ki ba pang bampong ne Cancer Wing jong ka Civil Hospital Shillong. Ha kane ka jingleit jurip ïa ka Cancer Wing jong ka Civil Hospital Shillong, la synran da ka HOD Radiation Oncology Department ka Dr. Anisha Mawlong, u HOD Pathology Department u Dr. WB Langstieh, ha ryngkat ka jingsynran lang ki ophisar jong ka tnat ka koit ka khiah.
Haba kren sha ki lad pathai khubor hadien ka jingïalang bad ki doctor jong ka Cancer Wing bad kumjuh ki doctor jong ka Civil Hospital Shillong, ka Dr. Ampareen ka ïathuh ba ka jingpang bampong (Cancer) kadei kawei na ki kaba jur bha ha ka jylla kaba la shim ruh bun bun ngut ki jingim briew.
“Ban rat dkhong ïa ka jingpang bampong (Cancer) donkam ban lap naduh ba sdang, mano kita kiba ïoh ïa kane ka jait jingpang namar donkam ban sumar ïa kane ka jingpang naduh ki sngi ba ka sdang lyngshop ha ka met u briewg”, la ong ka Dr. Ampareen.
Ka Dr. Ampareen ka la ong ba na ka liang ka sorkar jylla khamtam ka tnat ka koit ka khiah ka la buh ïa ka thong lane kan pyntreikam da ka ‘Mission Mode’ na ka bynta ban rat dyngkhong ïa kane ka jingpang da ka ba pynbun bad pynkhlain ïa ki jingeksamin ban wad naduh ba sdang kane ka jingpang khnang ban lah ban sumar kloi katba lah ban ruh kumjuh ban leit pynsgngewthuh kumno lah ban kiar na ka jingshah lynshop ha kane ka jingpang.
Nalor kane ka Dr. Ampareen ka ïathuh ba ka Cancer Wing jong ka Civil Hospital Shillong ka la pyntreikam bha ïa ka skhim MHIS na ka bynta ban ïarap ïa ki ba wan shim dawai ne phah sumar hapoh kane ka Hospital namar jan 100 na ka 100 hi ki nongpang kiba wan sumar kim donkam siew namar ka la siew ka sorkar lyngba ka MHIS Card.
Katba na ka liang jong ka Dr Anisha Mawlong pat ka la ïathuh ba ka Cancer wing jong ka Civil Hospital Shillong ka la treikam naduh u bnai Nohprah jong u snem ba la dep kaba la ai jingshakri ïa kiba bun hajar ngut ki nongpang cancer. Ka la ïathuh ruh ba kiba wan shah sumar man ka sngi ha kane ka jaka ai jingsumar ki don kumba 50-60 ngut ha ka shisngi.
Ka la ïathuh ba ha ka jylla kiba ïoh thymmai ïa ka jingpang kim duna ïa ka 1000 ngut ha ka shisnem bad kiba bun hi ki dei na East Khasi Hills bad napdeng kine ruh kiba kham bun kiba ïoh ïa kane ka jingpang ki dei ki shynrang.
Haba bynrap lang ïa kane u Dr. WB Langstieh u la ïathuh ba kiba bun kiba ïoh ïa kane ka jingpang ki dei ki shynrang namar ka jingpyndonkam duma ruh ka kham jur ha ki.

Leave A Reply

Your email address will not be published.