Kyrpad ïa u Myntri ïa ki MLA ban mang pisa na ka bynta ban maramot ïa ki ïing skul ba la tor

0

Shillong, Lber, 15: U Myntri ka tnat Pule Puthi ka Sorkar Jylla u Rakkam A. Sangma ha ka sngi Balang u la kyrpad ïa ki MLA ba kin mang pisa lem na ka bhah kaba ki ïoh khnang ban ïoh shna pynbha ïa ki skul kiba la tor ha ki Constituency jong ki.
Ha ka jingïakren bad ki lad pathai khubor, u Rakkam A. Sangma u la ong ba kan sa don ka jingleh sorjamin ïa baroh ki skul khnang ban ïoh jingkheiñ halor ka jinglong jingman jong ki iing skul. Ïa kane ka jingleh sorjamin yn sa ai jingtip lada ki skul kiba don ha ki Sub-division lane ha ki Constituency ki la i donkam neem ban maramot noh mardor.
U la kyntu ïa ki MLA ba kin shim lem ïa kane ka jingkitkhlieh khnang ba kan don ka jingkylla dur ha ka pule puthi hapoh kane ka jylla.
Ka Sorkar Meghalaya Democratic Alliance (MDA-I) ka la shna palat 200 tylli ki Lower Primary School ba thymmai ha kylleng ka jylla. Ïa ki tender ladep ban aiti na ka bynta ban maramot ïa ki katto katne ki skul.
“Nga ruh nga kyrpad ïa ki MLA jong ka Jylla ba kin shim lem ïa kane ka jingkitkhlieh. La kumno kumno ki lah ban pyndonkam na ka MLA skhim ban maramot bad ban shna thymmai ïa ki iing skul,” u la ong bad bynrap, “ban kren hok, manla uwei pa uwei u dei ban shim ïa ka jingkitkhlieh namarba ka tnat Pule Puthi ka donkam ïa ka jingpynthymmai bad ka jingpynkylla dur.”
U Myntri u la ïathuh ba u la bthah ïa ka tnat ban lum jingkheiñ na baroh ki skul ha ka jylla bad kynthup ruh ïa ki skul kiba duna ka jingdon jong ki khynnah skul. “Ngin sa bishar bniah ïa kane bad ngin sa leh thik pa thik katkum ka jingdonkam,”u la ong.
Ha kaba ïadei bad ka jingthungkam ïa ki nonghikai, u Sangma u la ong ba ki don katto katne ki jingduna na ka daw jong ka Roster System haba pynshong nongrim katkum ka hukum jong ka Iingbishar High Court.
Ki don bun tylli ki skul Lower Primary ha ka jylla ki bym don nonghikai hynriew bnai haduh ar snem.
“Ha ka district South Garo Hills jong nga, ki don 26 tylli ki skul ki bym don nonghikai,” u la ong.
U Myntri u la ong ba ka Sorkar ka la thmu ban thung noh ïa ki nonghikai na ka bynta 59 sngi tad haduh ban da ai ïa ka Regular Appointment khnang ba kan ym don jingktah ïa ki skul.

Leave A Reply

Your email address will not be published.