Shillong, Lber 15 : U nongïalam ka BJP ba dei ruh u Myntri ka sorkar jylla, Bah AL Hek ha ka sngi Balang u la leit ban kynduh ïa u Myntri Khynnah ba dei peit ïa ka tnad Science and Technology ka sorkar pdeng, u Jitendra Singh ha ïingsah jong u na ka bynta bun ki kam pynroi ba ïadei bad ka jylla.
U Bah Hek u la leit ruh ban kynduh ïa u Myntri ka tnad Tourism bad DONER, u Kishan Reddy ha ophis treikam jong u ha nongbah Delhi ban ïa kren na ka bynta ban kyntiew ïa ki kam jngohkai pyrthei kynthup ïa ki jaka pynneh pynsah ïa ki dohkha bad ruh ban kyntiew ïa ki kam jngohkai pyrthei ha ki shnong kyndong nalor ban kyntiew ruh ïa ki jingsumar kynbat dawai tynrai.
Ha kane ka jingleit, u Bah Hek u la kynduh ruh ïa u National General Secretary ka BJP u BL Santosh ban ïa kren na ka bynta ban pynkhlain shuh shuh ïa ka party ha ka jingpynkhreh na bynta ka elekshon MP kaban sa long shen.
