Ka Election MLA 2023 ka la nangjan nangjan. Ki seng saiñhima sima lem bad ki kyrrong jongki ruh ki la sdang ban khih met khoh reh ban pynbang pynthiang ïa ki paidbah da ki ktien jali ja um bad ki kam leh mynleh kular ba lai phew jait. Manla ki jingïalang, ki paidbah ki ïa thap kti shaid shaid khlem da puson bha shaei kan poi ka jingthap kti jong ki.
Ki paidbah mynta ki la kham stad, kham sian bad kham shemphang ban ïa ki MLA/MDC namar kaei kaba jia ha manla ki jaka bad kylleng ka pyrthei, lah dep ïohi bad tip lut na dong sha dong.
Ki riew rangbah, ki longkmie bad ki samla ba la nang la stad, kynthei ne shynrang ki la sdang ban pei phang mynta bad sdang pynpaw ka jingsngewkhia bad ki la sdang ruh ban ïohi shynna ïa ka jinghiar arsut ka synshar ka khadar, ka ïoh ka kot, ka pule ka dangle haduh ka ïohkam ïohjam baroh.
Baroh ki kwah beit ïa kata ka jingkylla kaba kham biang. Don bun bah ki daw halor kata, hynrei, kawei na ki dawbah daw san ban wanrah biang ïa ka jingkylla thymmai sha kaba kham biang ka dei ka jingkylla ha ka synshar-ka khadar (political reform). Ka Political Revolution ka dei ban sdang noh naduh kane ka MLA Election 2023 ka ban sa long shen. Dei ki paidbah ki ban wanrah ka jingkylla ha ka synshar ka khadar (new political revolution) ym dei satia ki MLA/MDC kumba don kiba pyrkhat bakla.
Baroh baroh ki ïa angnud ban ïoh ka Election kaba khuid, kaba hok bad kaba shisha (free and fair election). Baroh baroh ki ïa kren ban lait na ka bor pisa, ki kyntien jali ja um ban pynbiej briew nalor ka sam tiar sam tar manla ka iing. Hynrei, baroh baroh pat ngi la ïa liat, la ïa ngat bad la ïa biej lut ha kine ki shangkhawiah ne ki jingriam (political trap).
Don tang khyndiat eh kiba lait shisha na kine ki jingriam. Ym don jingmyntoi lada tang khyndiat eh ki kwah jingkylla katba kiba bun pat ki shu kwah tang ka ktien katba ka kam bad ka mon pat kam kwah. Lada don uno uno uba kren kop bym treh ban ngop, uta lei lei un ngat nyngkong bad pynliat lang pat sa ïa kiwei kiwei de ki paralok ha kajuh ka thliew.
Katno ngut eh ki paidbah kiba don shisha ka nongrim kaba skhem (strong principle)? Katno ngut eh kiba don shisha ka jingkut jingmut kaba skhem (strong determination)? Katno ngut eh kiba hok bad ba shisha (true and simplicity? Katno ngut eh kiba lah ban shah (sacrifice) shisha ïa ki jingeh? Katno ngut ki bym kwah ïa ka pisa ïoh ei (easy money)? Katno ngut eh ki bym kwah ïa ki tiar ki tar ïoh ei (free materials)? Katno ngut eh kiban lait na ka jingshah ïalam bakla (misled/misinterprete) ha ki nongïalam paidbah? Uei u bym kwah ïa ka spah pyrthei bad ka jingsuk pyrthei?
Lada ngi jin da la lah shisha ban shah ban lait bad ban ngop na kum kitei ki jingpynshoi ha ka jingim briew ha kane ka pyrthei, kata, kan wan shisha ka jingkylla, lym kumta, ka jingjot,ka jingsniew bad ka jyrsieh ka la ap lypa ïa ngi ha jingkhang ha ki khyndiat snem kiban wan.
