Shillong, Risaw, 31: Ka Khasi Students Union (KSU) Laban Circle ha ka Lah Sngi U Blei ka la aiti da ka jingthoh ha u Myntr ka tnat General Administrative Department u Bah Sniawbhalang Dhar bad ha ka Commissioner & Secretary ka tnat GAD ka Kong Ripnar Lyngdoh ha kaba ïadei bad ka jingpynslem jong ka Sorkar Jylla ban pynkylla kyrteng ïa ka Zig-zag Road ba don ha Dorbar Shnong KOR sha ka Hoping Stone Lyngdoh Road.
Ka Seng ka la ong, ha u snem 2019 la don jingthmu ban pynkylla kyrteng ïa kane ka surok sha ka Ardhendhu Choudhary Road khlem ka jingtip bad ka jingmynjur jong ka Dorbar Shnong KOR bad ki nongshong shnong hynrei hadien ba la ieng pyrshah ka Seng bad ka Dorbar Shnong KOR la pynsangeh ïa kata ka jingthmu bad ha 27 tarik, Naiwieng, 2022 ki paidbah jong ka Shnong KOR ki la rai ban pynskhem ïa kane ka surok sha Hoping Stone Lyngdoh Road bad ki la phah ïa ka jingthoh sha ki bor ba dei peit.
Hynrei haduh mynta ym shym la lah ban ïohi ïa ki dak ki shin ba ka Sorkar kan leh ïa kaei kaba u paidbah u thrang bad kaba pynlyngoh pat ka long ba ka Kynhun Myntri jong ka Sorkar Jylla lyngba ka State Naming Authorities ha ka 27tarik, Jylliew,, 2022 ka la pynkylla kyrteng sa ïa kawei ka surok kaba don ha Dorbar Shnong Laban sha u Bhaskar Choudhary Road. Kane ka la pynbitar hi ïa ka Seng baroh kawei ïa ka jingthmu ka Sorkar ban pynsahnam ïa ka kyrteng ki surok bad ka jaka sha kiwei pat ki jaitbynriew ki bym dei riewlum.
Kine ki jingleh ki long khlem da shim ïa ka rai ne ka jingmynjur na ka Dorbar Shnong ne jong u paidbah nongshong shnong.
Kum ka Seng kan ïai pyrshah ïa ka jingleh jong ka Sorkar ha kaba ïadei bad kane ka bynta bad ha kajuh ka por ka kyntu ruh ba shuwa ban pynkylla kyrteng donkam ban ïoh ïa ka jingmynjur na ka liang jong ka Dorbar Shnong ne u paidbah bad dei ban don ka jingïalang pynsngew paidbah halor kine ki bynta khnang ban lait na ka kynrum kynram.
