Hato ka Sorkar thymmai kan shimkhia halor ki jingeh ki paidbah khappud?
Ka kam khappud ka mat ba kongsan ïa ka Sorkar thymmai
Nongstoiñ, Lber 1: Ka jingshah thombor jong ki paidbah ba shong ha shilynter u pud bad ka jylla Assam, ka dei ka mat kaba hakhmat eh ba ka sorkar jylla kaba thymmai jong u ne u snem 2023, ka dei ban shimkhia bha bad ban leh ei ei mardor.
Haba phai sha katei ka jingeh ba ki paidbah nongshong shnong ki mad, kam dei tang na kawei ka jaka ne tang na kawei ka District, hynrei ka long na baroh sawdong na shatei, na mihngi bad sepngi la shah thom bor ha ka sorkar Assam bad na shathie pat da ki briew na ka ri Bangladesh.
Watla ka jingshah thombor na ka phang shathie kam da ktah eh ïa ka sorkar jylla, namar ka dei ka mat ba ka sorkar pdeng ka hap ban shimti. Kaba lyngngoh pat ka long ba ha ki bynta jong ka jylla naduh sepngi, shatei haduh mihngi ba kynthup naduh Garo Hills,West Khasi Hills, Ribhoi, Block I & II kiba dei ki jaka kiba ka sorkar Meghalaya ka hap ban shimkhia.
Haduh mynta hi ka jingshah thombor jong ki paidbah ha kitei ki jaka khappud, ka la kylla long tang ka mat kaba ki politician jong baroh ki seng saiñ pyrthei ki la iehnoh bad buh tyngkai kyrpang tang na ka bynta ban pynlong ishu ha ki por election. Namarkata donkam shisha ba kita ki nongmihkhmat ban shimkhia noh mynta ka kynti.
Lah ban pynpaw ba ka jingthom bor jong ka Assam ïa ki paidbah ha ki shnong khappud, ka la ktah ym tang ïa ki kam pynroi kiba la mang pisa na ka sorkar jylla bad na ka sorkar pdeng, hynrei ka la ktah ruh ïa ka kamai kajih, ka ïoh ka kot bad wat ïa ka hok longbriew man briew.
Ka jingjia shah beh krad jong ki paidbah na ka thaiñ langpih ha u snem 1979, ka jingsiat ïap jong ki pulit Assam ïa saw ngut ki rangbah Khasi ha Langpih ha ka 14 tarik Jymmang 2010. Ka jingsiat ïap da ki pulit Assam ïa ki san ngut ki trai muluk ha Mukroh dang shen, ka jingbeh krad ïa ki paidbah nongshong shnong ha Sabuda, Block I & II ha ki snem ba la leit, ka jingshah beh krad jong ki 575 ngut ki paidbah nongshong shnong ka Huhapara ha ka miet 8 tarik Nailur u snem 2018, ka jingthmu ban tei dam ha wah Khri harum Kyrshai, kaba lah ban pynkylla phetwir ïa ki paidbah jong 16 tylli ki shnong namar ka jingtap ka um.
Halor kitei ki jingeh ba ki paidbah ka jylla ki ïakynduh na ka por sha ka por, ka sorkar Meghalaya ka la dei ban pyni kam noh bad ban ym shu shah pyndem tdong ha ka sorkar Assam. Namar ba ka sorkar BJP na Delhi ka ai lad bha ïa ka sorkar Assam ba kan leh katba mon, namar ha Assam ka BJP ka ïoh ban synshar marwei.