Hapoh shi bnai ai por ka JSM ïa ka NHAI ban pynbha ïa ka Surok NH-6 kaba la jot rathai

By Mawphor News Desk On Sep 13, 2023

Khliehriat, Nailur 12: Ka Jaiñtia Students Movement (JSM), Eastern Region hynne ka sngi ba Ar hapoh ka jingïalam u Samla Wellson RD Siangshai, President KSM-ER ha ryngkat ka jingsynran u samla Kerbhame Dkhar, Assistant Secretary JSM, CB lem bad ki dkhot ki la leit ban buh da ka jingthoh sha u Project Director, NHAI (PUI) Shillong lyngba ka ophis jong u Deputy Commissioner Khliehriat, East Jaiñtia Hills District ban dawa ba dei ban pynbha ïa ka surok NH-6 kaba la jot rathai hapoh ka shi bnai shwa ba ka seng kan shim da kiwei pat ki sienkam kiba tyngeh.
Kane ka jingai por jong ka seng ban maramot mardor ïa kane ka surok ka la long ruh hadien ka jingleit jurip bad hadien ka jingïoh pdiang ïa ka jingujor na na kiba bun balang halor ka jingsniew palat pud jong ka surok bah NH6 naduh Sohshrieh, EJH shaduh Malidor.
Kum ban shu pyn kynmaw ba kane ka surok NH6 ka dei u budlum ka ïoh ka kot jong ki nonshong jong ka Ri Jaiñtia baroh kawei ha kaba bun ki duk ki suk ki im ja bad ïoh kamai lyngba kane ka surok, kata da kaba ki die dukan bad ki jingdie madan ha baroh shilynter jong kane ka surok bah kaba pynïasoh ïa lai tylli ki jylla kaba na thaiñ shatei lammihngi, kata ka jylla Assam, Mizoram bad Tripura. Hynrei, ka jingsniew palat pud jong kane ka surok bah ka la wanrah ïa shibun jingeh kiba ha rukom bad kaba ktah ym tang ïa ki nongleit nongwan hynrei ïa baroh kiba ïoh jingmyntoi lyngba kane ka surok.
Ka Seng JSM, ER lyngba une u kyrwoh ka kwah ruh ban pynkynmaw ba tang hapoh Jaiñtia, ka jingjngai kaba don tang hapoh 60 KM don artylli ki tollgate ka NHAI, kata kawei ha ka Shnong Ialong bad kawei pat ha ka Shnong Lumshnong kiba treikam baroh 24 kynta ban khrong khajna na ki kali kamai kiba rit bad heh bad ki kali shimet kiba nabar jylla kiba ïaid lyngba kane ka surok bah, kata halor ka nongrim ban pynbha (maintenance) ïa kane ka surok bah katkum ki kyndon ka Ministry of Road and Transport, Government of India.
Hynrei ka jingkylli kaba heh kaba ka seng JSM ka kwah ban buh hakhmat ka NHAI, kaba biang lut ki technical expert ba shaei jah ka pisa ba ki khrong man ka sngi bad balei ba kane ka surok NH6 kam ïa ryngkat kyrdan wat bad ki surok ba pyntrei da ka tnat PWD jong ka Sorkar Meghalaya.
Kumta na ka liang ka seng ka la ai por hapoh shibnai ïa ka NHAI naduh ka sngi bala phah ïa ka memorandum ba kan leh ïa kaba donkam, bad ka Seng ka ngeit skhem ba ka NHAI kan shimkhia halor kane ka mat ban pynbha mardor ïa kane ka surok, hynrei lada jia ba ka NHAI kam leh ei ei ka JSM kam banse ban shim ïa ka lynti kiba tyngeh.
Ha ka juh ka por ka Seng JSM ka pynkynmaw ïa u Deputy Commissioner ka EJH halor ki katto katne ki mat kiba ka seng ka la dep ban phah da ka jingthoh na ka bynta ka jingbha jingmiat uba bun ba lang, kata ban buh da ka Notice Board ha DTO office, Khliehriat ryngkat bad ka dor ban leh ïa kot leh sla na ka bynta ki kali ryngkat bad ki kot ki sla ba donkam.
Kumjuh ka seng ka jingdawa ban pynbha noh kloi ïa ka surok Lad Rymbai Byepass, khnang ban pynsuk ka leit ka wan. Halor ka jingdonkam ban don ka Rehabilitation Center kaba treikam ha EJH khnang ban ai ka jingshakri kaba paka ïa ki khun ka District kiba la ngop ha kiingdih ba sniew.
Na ka liang jong u Deputy Commissioner ruh u la kular ban shimkhia halor kine ki mat ba donkam bad u la ai ruh ka jingïaroh ïa ki nongïalam ka seng halor ka jingshimkhia jong kin na ka bynta ka bha ka miat jong ki nongshong shnong ka district hi baroh kawei.