Ha ka jingphuh jingphieng rakhe ka ophis DMC ïa ka WLD 2023, 22 tylli ki skul wan ha ka Rally
Mawkyrwat, ‘Nailur 12: Ka ophis jong ka District Mission Co-ordinator (DMC), Sakmagra Shiksha Abhiyaan (SSA), South West Khasi Hills District mynta ka sngi ka la rakhe ïa ka World Literacy Day (WLD) 2023 kaba ha phang pdeng, “Promoting Literacy for a World in transition Building the for sustainable and peaceful societies”, ba la pynlong hapoh ka hall jong ka Maharam Government Higher Secondary School, Mawkyrwat bad u bah T. Lyngwa, IAS, Deputy Commissioner ka South West Khasi Hills District kum u kongsan.
Shwa ban sdang ïa ka jingïalang, na ka liang ka ophis ka la ïoh ban pynlong shwa da ka jingïaid paidbah ne rally kaba la sdang na lad Civil Hospital, Mawkyrwat sha ïew Mawkyrwat bad pynkut hapoh Maharam Government Higher Secondary School, Mawkyrwat ha kaba ïa kane ka rally la kaweh lama da u bah Staising Kharbteng, Sub – Inspector of School, Mawkyrwat bad uba la ai ruh ki kyntien lamphrang jong kane ka sngi ryngkat ka jingwan ïashimbynta ki 22 tylli ki skul bad ki nonghikai.
Ha ka jingkren lamphrang jong u, u la ong ba ka imlang sahlang bad khamtam ki khynnah pule ki dei ban sngewthuh ba ka kyntien Literacy ka kdew ïa ka jinglah ban pule bad thoh ha kaba iwei pa iwei na ki nongshong shnong ki don ka hok ban ïoh ka lad ban leit sha ki jaka pule. U pynkynmaw ruh ba ka jingnang jingtip ban pule ka dei ban sdang na ki rympei ïing ban long ka nuksa ïa ki khun ban sngewtynnad bad bang ban pule. U la ong ruh ba ki long u maw-jingkieng ka jingkyrmen hapdeng ki jingeh kiba bun bad kan wanrah ki jingkylla kiba bun ha ka jingim jong ki khynnah pule ha ki sngi bad por ban wan ïa kaba ngin ym lah ban ïohi lypa.
Shuh shuh u ong ba ka jingnang jingstad kan ïarap ïa ki baroh ba kin don ïa ka bor pyrkhat ne reasoning power kaba khlaiñ ban shim ïa kano kano ka rai ha ka jingim jong ki khlem da shah ïalam bakla ha kiwei.
U la kyntu ruh ïa ki khynnah skul ba ki dei ban nang kumno ban pyndonkam ïa ki rynsan social media kiba pher bapher ki ban kyntiew ïa ka jingnang jingtip khnang ba ka lawei jong ki kan long kaba phyrnai da kaba kyntu ba kim dei ban shu ngeit kulmar lut ïa kiei kiei baroh kiba ki ïohi bad lap ha social media namar ka don ka por ba ki don ki jingshim kabu da ki ‘riew thok riew shukor ïa kiba lui lui.
U la pynshai ruh ruh ba ka long kaba donkam ba ki khynnah kiba la iehnoh shiteng por ïa ki jingpule jong ki ban leit phai biang sha ki jaka pule na bynta ka jingmyntoi jong ki.
Katba ha ka jingkren jong u bah T. Lyngwa, IAS, Deputy Commissioner ka South West Khasi Hills District kum u kongsan u la ong ba ka jingrakhe ïa kane ka World Literacy Day ka dei hadien ka jingïamir jingmut naduh ki snem 1965’s World Conference of Ministers of Education ha Tehran, ha kaba ka la don ka jingïatai ban shim kahm kyrpang ïa ka jingdonkam ban rad dyngkhong ïa ka sahdien bad ka jingbiej. U mrad u kham proh ka jabieng ban ïa u briew, hynrei lyngba ka jingnang jingstad pat u briew u kham kiew ha ki liang baroh bad u lah ban kyntiew ruh ïa lade bad pynbha ïa ka imlang ka sahlang.
Shuh shuh u la ong ba ka jingnang jingstad ka lah ban sdang naduh na la rympei bad kan kut ka jingïap, namarkata, lada ki briew ki kwah ban wad ïa ka jingstad ha ka ym don ka jingkut. Kumta ka long kaba donkam ba kum ki khynnah skul kim dei ban long kiba jaituh hynrei ki dei ban long kiba smat lyngba ka jingtrei shitom jong ki ban wad ïa ka jingstad da kaba kin ai mynsiem lem ïa kiwei de ki para khynnah ba kim dei ban ieh noh shiteng por ïa ki skul pule.
“Haba ki don ha ki jingpule, kin don shibun ki jingpynshoi namar ki im mynta ha ka juk jong ka saïan kiba long lyngba ki social media hynrei kum kiba la nang la stad kim dei ban shah ïalam bakla pynban ki dei ban nang kumno ban pyndonkam ïa ka por jong ki ha ki jingpule”, ong DC da kaba kin long ki khynnah skul kiba pyndonkam hok ruh ïa ki sap ki phong ba ki ki don kum ha rwai ka siaw, ka dro jingdro bad ha ki sap bapher bapher.
Ka kong Nadine G.B. Jyrwa, District Out of School Children Co-ordinator, Sakmagra Shiksha Abhiyaan (SSA), South West Khasi Hills District ka la ai katto katne ki jingtip shaphang kane ka sngi ba kyrpang bad kaba la ïathuh ruh ba ka Literacy Rate jong ka South West Khasi Hills District katkum ka census jong u snem 2011 ka long 76.54% kata ki shynrang 77.33% bad ki kynthei pat 75.73%.
La ïoh ruh ka jingkren ai mynsiem na uwei na ki khynnah skul kata u Sambok Lyngdoh Nonglait, ba shong klas VIII jong ka Domkynjit Upper Primary School bad bud sa ka jingshad na ka Ibanpyntngen Tongwah, bad ka Beat Boxing na ka Deiphiwansara Lyngkhoi jong ka Nineset Lower Primary School.
La pynbud ruh ka jingsam ïa ki khusnam sha ki nongjop ha ka Slogan Competition, Drawing Competition, bad kyrpang ïa ki Out of School Children (OoSC) bad Child with Special Care (NwSC).
Kiba la ïadonlang ha kane ka sngi ki long u bah L.W. Nongpluh, Additional Deputy Superintendent of Police, South West Khasi Hills District, u bah D.G. Nongsiej, Principal jong Maharam Government Higher Secondary School, Mawkyrwat, u Dr. K.K. Nongsiej, Principal jong ka Sngap Syiem College, Mawkyrwat, u bah S.S. Lyngkhoi, Additional SDSEO, South West Khasi Hills District, u bah S. Kharbteng, Sub Inspector of Schools bad kiwei de.
Kham hashwa, ka kong M. Iawphniaw, District Pedagogy Co-ordinator, Sakmagra Shiksha Abhiyaan (SSA), South West Khasi Hills District ka la pynïaid ïa ka jingïalang katba ka kong Dianghunlang Warjri, District Community Mobilization Co-ordinator, Sakmagra Shiksha Abhiyaan (SSA), South West Khasi Hills District ka la ai ki kyntien khublei bad pynkut pat da ka jingrwai ïa ka National Anthem.