Hapdeng ki ummat jingkmen pdiang ki khunswet ïa ka ïing ba paka ba pynshna da ka Seng Samla Mawlasnai

Nongpoh, K’Lyngkot 22: Ki ummat jingkmen jong 6 ngut ki shipara kiba la duh noh ïala ki jong ki kmie ki kpa kila tuid hadien ba kila ioh pdiang syndon da ka ïing shong ïingsah kaba paka kum ka jingai sngewbha snem thymmai, bala pynshna da ka Seng Samla Mawlsnai bala aiti syndon sha ki haka sngi Saitjaiñ, kaba long ruh kawei naki nuksa ba bha sha kito kiba don ka mynsiem ban ïarap ïa kiba donkam ka jingïarap.
Ïa katei ka ïing la shna haka jinglut kaba la poi kumba 3 lakh eiei ha kaba 1.30 lakh ka dei bala mang lyngba ka skhim PMAY-G ryngkat ka jingnoh synñiang kiwei kiwei ki riew rangbah, ki kynhun sengbhalang bad ha katei ka sngi ka jingaiti ïa katei ka ïing la don ryngkat ruh da u Bah Joplin Sten Sordar ka Mawlasnai kum u kongsan, haka jingdonlang u Bah Staising Kharbteng, Dr. Kitborlang Pariat, Samla Shemphang Masharing President ka seng Samla bad kiwei kiwei.
Kum ban shu pynpaw ba kitei ki 6 ngut shipara kim don shuh ïaki kmie ki kpa ki ban ri ban sumar ïaki bad ki shong ki sah ha kawei ka ïing ba jot rathai ha katei ka shnong, hynrei da ka jingshimkhia jong ka seng Samla bad ki bor shnong la lah ban pyndep ïa katei ka ïing shong kaba thymmai haka rukom kaba itynnad ba kin ioh ban shong ban sah ryngkat ki tiar ki tar bala pynbiang ha katei ka ïing.
Haba kren ha katei ka sngi naka liang u Bah Joplin Sten u la pynpaw ka jingsngewkmen bad kadei ka sngi sah kynmaw ïaka Dorbar Shnong bad kumjuh ruh ïaka seng Samla bala lah ban aiti ïa katei ka iing naka bynta ki 6 ngut ki khunswet ha katei ka shnong kiba don hapdeng ka jingkordit namar ba ym don shuh ba peit bad khmih ïaki hynrei u hynrei rangbah u hap ban shim ka jingkitkhlieh bad ka lyngkor kaba khia ban peit ïaki para.
“U Blei un nym iehnoh ïa kiba donkam ka jingïarap bad kane ka jingioh pdiang kitei ki khunswet ïaka ïing ba thymmai ka dei ka jingplie lad plie lynti jong u Blei u ba iohsngew bad iohi ïaka jingiam bad ka jingdonkam jong ki, bad lehse un Blei un sei ruh ki mawlynnai ba kordor napdeng kitei ki 6 ngut ki shipara ki ban long ki khlur ba tyngshaiñ bad kyrshan ïaka ïing ka sem” la ong u Bah Joplin da kaba bynrap ruh ba ka jingkhublei ba kyrpang ka leit sha ka Seng Samla kaba la shim ïaka sienjam ban peit bad khmih ïaka jingeh jong kitei ki khunswet da kaba wad ki lad ki lynti ban pyndep ïa katei ka ïing bad kyntu ruh ïa kitei ki khunswet ba kin dang leh tipsngi haka jingim jong ki namar khlem pep u Blei un sa plie ka lad ka lynti shisien ka sngi.
U Bah Staising Kharbteng uwei naki nongnoh syn1ian u ba la don ryngkat ha katei ka sngi u la ong ba ka sienjam ba ka Seng Samla bad ki nongïalam shnong kila shim ka long ka nuksa kaba bha tam bad ka nuksa sha kiwei pat ki riew rangbah kiba ioh ba kot bad kiba don ka lad ban ïarap ïa kito ki longiing kiba duk ba kyrduh bad kiba donkam ka jingïarap.
Naka liang u Samla Ribal Shadap kum u hynmen rangbah jong kitei ki shipara ki khunswet u la pynpaw ka jingsngewkmen kaba khraw bad ai khublei ïa baroh kiba don bynta ban pynioh ïaka iing ba thymmai ba kin ioh ban shong ban sah ryngkat ka jingkyrkhu kyrdoh ïakito ki nongsamaria ba bha ba kin dang ioh ka met kaba koit ba khiah ba kin dang lah ban shakri bad ban leh ki kam isynei sha kylleng ki jaka.