Nongstoiñ, Naiwieng, 17: Ki nongrep kiba na ki shnong bapher bapher jong ka West Khasi Hills, ki la jaw ummat brub namar hapdeng ka aiom kaba kmen na ka bynta jong ki ban lum ban lang ïa u kba u khaw, hynrei u ‘lapbah ha ka sngi palei u la ther ha ki katto katne ki bynta jong ka District, kat haduh ba ki don bun jaka kiba u kba u la jhieh lut.
Kawei na ki shnong ka dei ka Tiehbah Nongstoiñ, kat haduh ba ki nongrep ki la ud la nam na ka daw ka jingduhnong kaba jur hadien ba ka um ka la kit jan baroh hi ïa u Kba bad bun ruh ba la shu per ha sla um.
Kane ka jinghap slap kyndit ka la jia ha ka por noh phai sngi ha kaba ki nongrep ki dang ot dang lum ïa u kba ha ki pynthor kiba don ha katei ka shnong. La ong ba ha ha Tiehbah u Kba u ba dang shu dep ot bad u ba la lum shi jaka satang ban shoh u la shu shah kit noh ha ka um. La ong ruh ba ka jingduh nong la shu antad ba uwei uwei u trai pynthor u duh palat ïa ka 15 hajar ei ei.
Ki trai Kba ha Tiehbah kiba shah ktah ki kynthup ïa u bah Branli Marweiñ, bah Tholing Kharlyngdoh, kong Ispilian Mawlieh, Eldaris Thongni bad kiwei kiwei ruh. La ong ba ki nongrep ki la pyrshang ban lum biang da kaba pyndonkam da ki jaiñ jri bad tarpolin ban tam biang kat kito kiba la dep ban ot bad per ha sla um.
Nalor nangta ha kiwei kiwei ki shnong kylleng ka District kiba ka jingjulor ka la jur bha na ka daw jong u slap, tangba haduh ba thoh ïa kane ka khubor, ym pat lah satia ban ïoh jingkheiñ ne jingtip kaba bniah.
