Shillong, Naiwieng 17 : Ka Delimitation Committee (DC) jongka Khasi Hills Autonomous District Council (KHADC) kan pynlong ïa ka jingïalang ba kyrpang ha ki 23 tylli ki constituency na ka bynta ban sngap ïa ka jingai jingmut ki paidbah bad kane ka long shi bynta na ka jingpynkhreh ban phiah ïa ki constituency ha shwa ban long ka election MDC ha u snem ban wan.
Haba kren ha ki nongthoh khubor u Chairman ka DC u Dr Kharsyiemlieh u la ïathuh ba kane ka jingïalang ban sngap ïa ki jingai jingmut bad ki jingkren jong ki paidbah ha ki 23 tylli ki constituency kan sdang naduh ka 21 tarik mynta u bnai bad kan kut haduh ka 15 tarik Nohprah.
U Dr Kharsyiemlieh uba dei ruh u Nogbishar ba la shongthait jongka District Council Court u la ïathuh ba kine ki jingïalang kin long ha ki ar tylli ki constituency ha South West Khasi Hills kata ha Mawkyrwat bad Langrin bad ka jaka kan long ha ophis jongka District Council ha Mawkyrwat bad ka tarik kan long ha ka 21 tarik mynta u bnai. Na ka bynta ka Eastern West Khasi Hills ka tarik kan long ha ka 24 tarik bad ka jaka kan long ha Mairang.Hangne ha East Khasi Hills ka tarik kan long ha ka 28 tarik bad ki constituency kin long ka Sohryngham, Mawkynrew, Nongkrem, Langkyrdem, Laitkroh ka jaka kan long ha Shillong. 1 tarik Nohprah pat ka jingïalang kan long ha Sohra Civil Sub Division na ka bynta ka Sohra bad Shella ka jaka kan long hi ha Sohra. Na ka bynta ka Ri Bhoi ka jingialang kan long ha Nongpoh ha ka 6 tarik Nohprah bad ki constituency ki long Jirang, Nongpoh, Mawhati, Umsning bad Umroi. Ha ka 13 tarik Nohprah ka jingialang kan long biang ha Shillong na ka bynta ka Mylliem, Laban-Mawprem, Pynthorumkhrah, Jaiaw, Mawlai, Mawphlang, DIengiei, Nongspung Sohiong. Ha ka 15 tarik Nohprah ha Nongstoin, West Khasi Hills na ka bynta ka Nongstoin, Rambrai-Jyrngam bad Mawshynrut.
Kine ki public hearing kin sdang naduh ka por 11 baje mynstep haduh ka por 4 baje janmiet.
“Ngi pdiang sngewbha ïa ki jingpynsngew bad ki jingai jingmut na baroh ki kynhun bapher bapher. Kumta, ngi kyrpad ïa ki paidbah ba kin wan shakhmat ban ïashim bynta ha kane ka public hearing” ula ong.
Halor ka jingkylli, u Bah Kharsyiemlieh ula ong ba ïa mynta ka Mawlai ka dei kaba don bun eh ki nongthep vote kaba la kot ïa palat 45000 ngut bad ka Laban-Mawprem ka dei kaba don duna eh kaba long tang 12000 ngut.
U iathuh ba ïa kane ka committee la thaw halor ki jingkyrpad bala ïoh da ka KHADC halor ka jingdonkam ban pynkynriah ïa ki katto katne ki shnong na kawei ka constituency sha kawei pat.
“Ngin pyrshang ban pyndep kham kloi ïa kane ka kam. Lada ngim lah ban pyndep, ka bor bathung ïa ngi kan sa shim ïa ka rai hynrei ka jingthmu jong ngi hi ka long ban pyndep noh kloi ïa ka kam” ong u Bah Kharsyiemlieh.
Kat kum ka jingong jong u, ka EC kam shym la buh satia ïa kano kano ka por ban pyndep hynrei kala shu kyrpad ïa ka Committee ban aiti kham kloi kat kaba lah ïa ka kaiphod.
