Shillong, Naiwieng, 17: Ka Hynñiewtrep Achik National Movement (HANM) ha ka sngi Thohdieng ka la pynpaw ba kan sa leit ïakynduh ïa u Myntri Rangbah ka Jylla Assam u Himanta Biswa Sarma ban kyrpad ba un kyntu lem ïa ki MP jong ka Jylla Assam ba kin ai jingkyrshan ïa ki lai tylli ki mat jingdawa jong ka Jylla.
Ki jingdawa ki kynthup ïa ka jingpynrung ïa ka Ktien Khasi bad Garo ha ka Khyrnit Baphra jong ka riti Synshar ka Ri India, ban pyntreikam ïa ka Inner Line Permit bad ka jingpynbeit noh ïa ka jingeh ba ki paidbah ki la mad baroh shikatta ha khappud.
“Ngi sa leit ban ïakynduh shwa ïa u Myntri Rangbah ka Jylla Assam u Himanta Biswa Sarma ban kyntu ïa u ba un kyntu ïa ki MP jong ka Jylla Assam ban kyrshan lem ïa ki lai tylli ki jingdawa jong ka jylla hapoh ka Parliament,” la ong u President ka HANM Bah Lamphrang Kharbani ha ka jingïakren bad ki lad pathai khubor.
Ka seng ka la dawa ruh ïa ki lai ngut ki MP jong ka Jylla Meghalaya, kata ïa u MP ka Shillong u Bah Vincent H. Pala, ïa ka MP jong ka Tura ka Agatha Sangma bad ïa u MP ka Rajya Sabha u Dr. Wanwei Roy Kharlukhi ba kin shimkhia kum ki nongmihkhmat kiba la jied da u paidbah ba kin kren hapoh ka Parliament ha kaba ïadei bad ka jingdawa jong ki paidbah nongshong shnong jong ka Jylla Meghalaya ban pynrung ïa ka ktien Khasi ha ka Khyrnit Baphra jong ka Riti Synshar ka ri India, ka jingdawa ban pyntreikam ïa ka Inner Line Permit ha kane ka jylla bad ban weng ïa ka jingeh jong ki paidbah kiba shong basah ha khappud.
U Bah Kharbani u la ong, “lada ka Sorkar India ka shimkhia hynrei lada ki (MP) jong ngi kim shimkhia kumno ka Parliament kan mynjur ïa kine ki jingdawa jong ka jaidbynriew. Ngi kyrpad ïa ki MP ba ki dei ban sngewthuh ïa ka dor jong ka jaidbynriew, ïa ka dor jong ka pateng ka ban sa wan da kaba rah hapoh ka Parliament.”
“Ka shong ha ka jingstad jong kine ki lai ngut kumno ba kin ïasyllok bad kiwei pat ki para MP jong ka thaiñ Shatei Lammihngi baroh kawei,” u la ong.
U la ong kumba ladep shim ïa ka rai ha Delhi ha ka jingpynlong ïa ka jingïakhih ba jaijai dang shen ha Jantar Mantar, ka seng kan ym shong thait ban ïakynduh ïa kiba bun ki MP jong ka thaiñ Shatei Lammihngi.
“Ha ka jingïakhih ba la pynlong da ka seng ha Jantar Mantar, New Delhi, ngi la ïakynduh ruh ïa ki Ophisar jong ka Ministry of Home Affairs bad ki la kular ban sa peit bniah ïa ki lai tylli ki jingdawa ïa kiba ka HANM ka ladep ban pynsngew hakhmat jong ka Sorkar India,” la ong u Bah Kharbani.
