Nongstoiñ, Jymmang 7: Ka Hynñiewtrep Youth Council West Khasi Hills District Unit ka la pynthmmai ïa ki nongkitkam jong u snem 2023-26 ha ka jingïalang kaba la long ha Bishop hall New Nongstoiñ ha ka sngi saitjaiñ.
Ki nongkitkam ba thymmai kiba la pyntian smai ha katei ka sngi ki long President Lumlang Kharsyiemlieh, Vice President Jeremiah Dkhar bad Distarborlin Wanñiang, General secretary Wanteibok Lyngdoh, Assistant Secertary Chesterwell Kharbani bad Losbingwell Lyngkhoi, Education secretary Ïarapbha Shangritis, Assistant Education secretary Shaiñborlin Syiemlieh, Organising secretary Redyfernandy Sunn bad kiwei kiwei.
Shuwa ba u bah Robertjune Kharjahrin President rangbah ka seng un ai jingkren, u la pyntian smai shuwa ïa ki nongkitkam ba thymmai jong ka District. Kiwei kiba la donlang ban sakhi ki long u bah Roykupar Synrem General secretary bad kiwei kiwei ki nongïalam ba hakhmat jong ka seng kmie kiba la wan ban ïadon ryngkat ha katei ka jing pynthymmai ïa ki nongkitkam ka District unit.
Hadien ka jingpyntian smai u bah Robertjune President Rangbah ka seng, u la kyntu ïa ki nongkitkam bad ki dkhot jong ka District ki circle haduh ki unit, ba kin trei da ka jingshitrhem bad ka jingkitkhlieh na ka bynta ka ri bad ka jaitbynriew.
U la ong ruh ba ki nongïalam bad ki dkhot jong ka seng ki dei ban sngewthuh shai, ba ka jingieit ïa ka jaitbynriew ka dei ba uwei pa uwei u dei ban don ka saiñ pyrkhat kaba paka, namar ha kine ki sngi ki don ar bynta u riew ieit ri bad u riew isih bar ri. U la ong ruh ba u riew isih bar ri u leh ïa kiei kiei ki bym ïahap hynrei u riew ieit ri pat u leh ïa kiei kiei da ka jingshemphang.
U la pynkynmaw ba ha kine ki sngi ka la don ka jingpynsngew thuh bakla sha ki paitbah ha kaba ïadei bad ka riti ka dustur jong ka jaitbynriew. U la ong ruh ba ka jinglong kum ki nongïalam sengbhalang kam dei kaba suk, namar ki jingkynthoh, ki jingkren beiñ bad wat ki jingshah byrngem byrsit ruh kin jia, hynrei ki hap ban long kiba skhem ka jingmut bad kiba don ka jingïaishah.
