Shillong, Jymmang, 07: Ki dkhot jong ka Zandu Foundation na ka bynta koit ka khiah na Ambach, Valsad, Gujarat, kiba dei stad wad bniah ha kaba ïadei bad ki dawai kynbat ki la leit jngoh ïa ka Institute ka Bioresources bad Sustainable Development (IBSD), Upper Shillong, na ka bynta ban wan peit kyrpang ïa u Gaultheria fragrantissima Fragrant Wintergreen, ba la tip ha ka ktien Khasi kum u Jathynrait bad Lathynrait.
Kane ka kynhun kaba la wan poi ha ka sngi Saitjaiñ ka la leit jngoh ïa ka jaka sara symbai, ka jaka wad bniah bad ïa ki dawai kynbat kiba ïadei bad ka jingpynkhreh ïa ki symbai na Laboratory ban thung ha khyndew katkum ka jingdonkam jong ki nongrep hapoh ka skhim Himalayan Bioresource Mission.
Ka jingwan poi jong kine ki stad wad bniah ka long kumno ban pynïaid iew ïa ki ban kyntiew ïa ka ïoh ka kot da kaba thung ïa u Jathynrait ban ïoh jingmyntoi ki nongrep da kaba yndon kam ha kaba sumar briew bad ïa kane la pynïaid hapoh ka jingpeit u Director ka IBSD u Prof. Pulok K. Mukherjee.
Ka IBSD ka pynïaid ïa kane ka skhim ka long ban kyntiew ïa ka jingsumar tynrai da ki dawai kynbat, ha kane ka skhim ka jingpynshlur ban thung ïa u Gaultheria fragrantissima bad ïa u Swertia chirayita la rah sha ki jaka thung jong ki nongrep ban ïoh ïa u symbai uba bha.
