Hap ban pynkylla biang hadien ba pynbeit thymmai ïa ka Khyrnit ba hynriew: Dy. CEM
Ba byrngem tur ki 21 shnong sha KHADC
Shillong, Nailur 24 : Hadien ba ka jingbyrngem jong ki 21 tylli ki shnong na West Khasi Hills ban tur sha KHADC, na ka liang u Deputy CEM jong ka Khasi Hills Autonomous District Council, Bah Pynshngaiñ N Syiem u la pynshai ba ka jingmynjur ban pynbeit thymmai ïa ki MDC Constituency ha u pud u sam ka KHADC kadei kaba la leh da ka jingmynjur jong ka Iing Dorbar ym dei tang da ka Executive Committee.
Lah ban kdew hangne ba ka jingbyrngem jong kitei ki 21 shnong ban tur sha KHADC kadei halor ka nongrim ba ki kwah ba dei ban pynneh beit ïa ki shnong jong ki ha Mawshynrut constituency ym ban pynkynriah noh ïa ki sha Rambrai constituency kumba la kdew ha ka jingphiah pud thymmai ïa ki Constituency thymmai ba la leh da ka Delimitation Committee jong ka Council.
Haba kren bad ki lad pathai khubor, u Deputy CEM u la kyntu ruh ïa kitei ki shnong ba kin ïai shah mynta namar lada jia ba ka Sorkar India ka wanrah ha Parliament ïa ka jingpynkylla thymmai ïa ka Khyrnit kaba Hynriew, khlem pep kan don biang ka jingpynbeit thymmai ïa ki constituency namar la hap ban pynbun shuh shuh ïa ka jingdon ki constituency.
“Kumta lada wanrah noh ïa katei ka jingpynbeit thymmai ïa ka Khyrnit ba Hynriew ha Parliament kan long kaba kabu kaba biang eh ïa kitei ki 21 shnong ban ïoh pynbeit thymmai,” ong u Deputy CEM.
Ha kajuh ka por, u ong ruh ba hadien ba ka samoi pynjlan elekshon ka la kut noh ha u Rymphang jong u snem ban wan, ka samoi treikam jong ki MDC ka la kut.
“Katkum ka jingsngew thuh jongnga lada jia ba wanrah ïa ka Amendment jong ka Sxith Schedule ha Parliament ha u Nohprah mynta u snem khlem pep yn hap ban pynjlan biang ïa ka elekshon sa khyndiat bnai tangba ka jinglong MDC ka la kut namar katkum ka Sixth Schedule ym lah shuh ban bteng ïa ka samoi treikam hadien ba la pynjlan shisnem,” bynrap biang u Deputy CEM.
Ha kajuh ka por u ong ruh ba u kwah ban pynshai ba kane ka jingkhih ban dawa pynkylla thymmai ïa ka Khyrnit ba Hynriew kam dei satia kaba leh tang ka KHADC hynrei kadei kaba la khih lang da baroh ki 10 tylli ki District Council jong ka thaiñ shatei lam-mihngi jong ka Ri.