Shillong, Nailur 24: Ka Myntri ka tnat ka Koit ka Khiah ka sorkar jylla ka kong Ampareen Lyngdoh ha ka sngi baar ka la ong ba shen yn sa khot tender noh ha kaba ïadei bad ka jingtreikam jong ka 108 emergency services ha ka jylla.
Ka la ong ba ïa mynta ïa ka rukom treikam ki emergency services la peit shipor da ka National Health Mission (NHM).
“Mynta sa tang ba ngin khot noh ïa ka tender jong ka 108 emergency services ha ka jylla,” ong ka kong Lyngdoh hadien ka jingïalang bad ki nongtrei ka 108 kiba la pynpaw ruh ïa ka jingkmen hadien ba ka sorkar ka la rai ban kyntiew ïa ka tulop jong ki.
“Nga kyrmen ba ha kane ka por kan ym don kano kano ka jingeh ban pyntreikam ïa kane ka jingthmu naba ngi la mad ha ki por ba la dep ba ki don ki jingduna. Ha kane ka por kin don bun ki tnat ki ban long ki dkhot jong ki committee ki ban peit ïa ki jingdonkam ha kaba ïadei bad ki kot ki sla (bidders),” ka la ong.
“Ngi donkam ban leh kloi ïa kane ka kam khnang ba ki kam ki jam jong ka sorkar kin long kiba ïaid beit ïaid ryntih ka ban long ruh ka jingïarap ïa ki nongtrei ka 108 bad ba kin ïoh ïa ki hok,” ka la ong.
