Shillong, Nailur, 24: Ki shipai Border Security Force (BSF) jong ka 1st Battalion, Meghalaya kiba la ïoh ïa ka jingtip kaba bniah na ki tnat syntiat ha ka Lah Sngi u Blei ki la pynlong ka jingpynap ktem hajan ka Border Out Post (BoP) Kanai ha kaba ki la ïohkem ïa uwei u mynder Bangladeshi ïa uba la tip kyrteng kum u Tonik Hajong, 38 snem ka rta uba sah ha Netrakona District, Bangladesh bad na ka met jong u, ki shipai BSF ki la ïoh ban kurup 2,37,500 lak Taka ka pisa jong ka ri Bangladesh.
Ha kawei pat ka jingkhynra, ki shipai BSF jong ka 4th Battalion ki la ïoh ban kurup ïa ki jingsleh pynbhabriew kiba kot haduh 15 lak tyngka.
Katkum u kyrwoh ba la phah da ka tnat shipai BSF, la ïathuh ba ka kynhun jong ki shipai BSF ki la ïakynduh markhmat bad ka kynhun ki runar kiba don kumba 40-5 ngut katba ki dang thmu ban shalan tuh ïa ki mar khaii tuh na khappud.
Da ka jingpynibor jong ki shipai BSF, ki runar ki la iehnoh shadien ïa ki mar khaii tuh bad ki la phet krad lai lum lai wah da kaba shim kabu ïa ka jingbren jong ka khlaw.
Ïa u mynder Bangladeshi uba la shah kem ryngkat bad ka pisa ba la ïoh kurup ki shipai BSF ki la aiti noh sha ki Pulit katba ïa ki tiar ba la ïoh kurup la aiti noh sha ka ophis custom ban leh ïa kaba donkam katkum ki kyndon jong ka aiñ.
