Nongpoh, Risaw 17: Ka Lynti Jam Football Center Meghalaya haka sien ba 7 kan pynlong biang ïaka Sunfeast Cup 2023 naka bynta ban kyntiew ïaka kam ialehkai haka jylla bad ha kane ka kynti ba mynta ïa katei ka lympung yn pynïalehkai ha madan Mawlein Mawkhan ha Ri Bhoi ban sdang naduh ka 26 haduh 31 tarik Risaw 2023.
Haba kren sha ki lad pathai khubor naka liang u Bah Sumar Swer President ka Lynti Jam Football Club u la ong ba kane kadei ka sien ba 7 ba ka Lynti Jam Footbal Center kan pynlong ïa katei ka lympung ïalehkai haka jingïatreilang bad ka SPT Sports Bangalore ha kaba ka jingïakhun kan long haka kyrdan U-13 ki shynrang bad U-16 ki kynthei bad la wer ruh ïa baroh ki kynhun ïalehkai naduh ki club, ki shnong bad ki skul ban wan shim bynta ha katei ka lympung ban long ruh kum ka lad ban kyntiew ïaki haka kam ïalehkai phutbol haka jylla.
U la pyntip ruh ba ka screening na kabynta katei ka lympung kan long haka 23 tarik Risaw ha madan Saiden bad la kyrpad ruh baroh ki nongïashim bynta ba ki dei ban rah ïaki ID skul, Adhaar Card, Birth Certificate bad kiwei kiwei.
U la ong ruh ba kane ka lympung ïalehkai ka dei ruh ka lynti bad ka lad ïaki khynnah kiba don ka sap ba kin kiew shaphrang haka kam ïalehkai phutbol, namar ba yn jied ruh ïaki khynnah kiba kynsai ban shah pyntbit haki jaka hikai (Football Academy) bapher bapher.
