Shillong, Rymphang 07: Haduh 379 ngut ki kyrtong ki la thep kyrteng ha ka sngi ba kut jong ka jingïathep kyrteng ban ïakhun ïa ka elekshon MLA 2023. Kine ki long 342 ki shynrang bad 37 ki kynthei.
Napdeng ki kyrtong kiba la thep ban ïakhun ki long u National President ka NPP bad Myntri Rangbah ka jylla, u Conrad Sangma, u MP ka Lok Sabha bad President ka MPCC, u Bah Vincent H. Pala, u Parliamentary Party Leader ka TMC bad Myntri Rangbah barim, u Dr. Mukul Sangma, u President ka UDP bad Speaker ka Meghalaya Legislative Assembly, u Bah Metbah Lyngdoh, u President ka PDF, u Bah Banteidor Lyngdoh, u President ka HSPDP Bah KP Pangniang, u President ka VPP, u Bah Ardent Basaïawmoit, u nongialam ka BJP u Bah AL Hek.
Kiwei kiwei pat ki kynthup ïa ki Myntri ka sorkar jylla kum u Bah Prestone Tynsong, u Bah Lahkmen Rymbui, Bah Renikton L. Tongkhar, Bah Kyrmen Shylla, u James Sangma bad kiwei kiwei.
Na ka liang pyrshah kiba la thep kyrteng ban ïakhun ki long u Bah Charles Pyngrope na ka TMC, u Bah George B. Lyngdoh u ban ïakhun na Umroi, u Zenith Sangma, ka Dikanchi Shira, ka Miani D. Shira bad kiwei kiwei.
Ha baroh ka BJP ka pynïeng 60 ngut, kata na baroh ki Constituency, ka NPP 57 ngut, TMC 52 ngut, UDP 45 ngut, VPP 17 ngut bad kiwei kiwei de ki ïa pynïeng kyrtong mar khyndiat.
Kane kadei ka elekshon kaba ym don ka jingïateh lok satai hapdeng ki Party kaba don ha ka jylla.
