Shillong, Rymphang 07: Ha ka sngi ba kut ka jingïathep kyrteng da ki hajar hajar ngut ki nongkyrshan jong ki Kyrtong bad ki Party bapher bapher ki la ïa tur sha ophis DC East Khasi Hills District na ka bynta ban synran bad pynshngaiñ ïa ki kyrtong jong ki.
Ki Party kiba la wan ïalam bun briew bha mynta ka sngi ki long ka UDP na North Shillong ha kaba u kyrtong ka Seng u Dr. Aman War u la mih ryngkat ba ki spah ngut ki nongkyrshan na Mawkhar ryngkat ka ksing ka dhah bad ki lama ba la kaweh pynshongshit da kaba tem artad ïa ka jingrwai jong ka Party. Ïa ka jingbun briew ka UDP la nang pynbun shuh shuh sa da ki nongkyrshan jong u Bah Paul Lyngdoh, kyrtong ka Seng na Shillong West.
Nangta ka Seng Congress, lyngba ki kyrtong jong ka na Sor kynthup ïa u Bah PN Syiem na Pynthorumkhrah, u Bah Ronnie V. Lyngdoh na Mylliem, u Bah JA Lyngdoh (Bah Dip) na North Shillong da ki spah ngut ki nongkyrshan ki la wan ha ryngkat ka shad ka kmen bad ka kynhoi.
Nangta na ka BJP la wan ki spah ngut ki nongkyrshan jong u Bah Himalaya Shangpliang u ba ïakhun na Mawsynram, nangta u Bah David Kharsati u ba ïakhun na Nongthymmai, u Bah Wandonboklang Jyrwa uba ïakhun na Mawlai bad kiwei kiwei.
Kumba long hynnin ka leit ka wan na surok jan ophis DC ka la thut namar ka jingkhapngiah surok.
Kane kadei ka sien kaba nyngkong ba ki paidbah da ki spah ngut ki paidbah kin ïoh ban poi hajan ophis DC bad dei kane kaba la ktah jur ïa ka leit ka wan ki paidbah ba wan lyngba ka Secretariat.
Ka jingïathep kyrteng ka la kut mynta ka sngi bad ka jingpeit bniah ïa ki kyrteng bad ki kot ki kan long ha ka 8 tarik. Ka tarik khatduh ban weng kyrteng kan long haduh ka 10 tarik. Bun ki paidbah ki la pynpaw ka jingkmen ba ka jingïathep kyrteng ka la kut noh bad ki la lait na ka jingkhapngiah ha ka leit ka wan.
Lah ban kdew hangne ba ka sngi thep vote kan long ha ka 27 tarik mynta u bnai bad ka sngi ban ñiew vote kan long ha ka 2 tarik u Lber 2023.
