Shillong, Rymphang 07: Da ka jingbitar ïa ka jingbym leh eiei ka sorkar MDA, ka High Court of Meghalaya ka la hukum ban pynap pahara noh da ki bor pahara jong ka sorkar pdeng ban talasi ïa ki trok kit dewïong beaiñ.
Ka jingpynmih hukum ka ïingbishar jong ka jylla kadei namar ki bor synshar kynthup ki Pulit kim shym la lah ban teh lakam ïa ka jingkhaïi tuh kaba la ïai bteng ha ka jylla.
Ïa kane ka hukum la pynmih mynta ka sngi hadien ba la shim bishar ïa ka PIL bad ka ïingbishar ba kynthup ïa u Chief Justice, u Sanjib Banerjee, u Nongbishar HS Thangkhiew bad u Nongbishar W. Diengdoh, ka la ong na nabar kiei kiei kim shym la ïaid katkum ka jingbthah ka ïingbishar, kumta la idei ban pyndonkam noh da ki Pulit jong ka sorkar pdeng ban shimti ïa kane kam ban talasi ïa ki kali kit dewïong.
“ïa ka jinglut na ka bynta kane ka jingshimti da ki Pulit ka sorkar pdeng yn hap bei da ka sorkar jylla”, la ong ka humum jong ka ïingbishar mynta ka sngi.
Shuh shuh ka hukum ka ong ba ka sorkar jylla ka la ïoh por shi snem ban pynbeit ïa kane ka kam, hynrei ka sorkar kam shym la lah ban leh eiei bad ka la pheil lut ha baroh ki liang ban teh lakam ïa ka jingkhaïi tuh ïa u dewïong.
Ka ïingbishar ka la dumok tyngeh ruh ïa u SP Ka East Jaiñtia Hills bad ka la khot hajir ne ban jingpynshai na u balei ba ym lah ban pynshitom ïa u namar ba u la pynkheiñ ïa ka hukum jong ka ïingbishar, ha kaba um shym la lah ban teh lakam ïa ka jingtih dewïong tuh kaba la jyllei ha East Jaiñtia Hills ba kaba kynthup ruh ïa ka jingkhaïi tuh.
Ïa kane ka kam yn shim bishar biang ha ka 14 tarik mynta u bnai.
