Hadien ka kynrum kynram bad u President, sha ka CoRP poi ki nongïalam ka HANM Western Ri-Bhoi

Nongpoh, Jymmang 31: Tang hadien ka kynrum kynram bad ka jingbym sngewthuh jingmut kaba la mih hapdeng ki nongïalam ka HANM Western Ri-Bhoi bad u President ka HANM sengkmie, kiba la mih noh naka seng da ka jingsngewrem bad khylliap lama syndon ïa ka HANM ha katei ka thaiñ dang ha kine ki khyndiat sngi, kitei ki nongïalam naduh u President lem bad ki dkhot mynta ka sngi kila leit pat ban pynïasoh noh ïalade bad ka Confederation of Ri-Bhoi People (CoRP) da ka jingshanñiah ïa kane ka seng ba kin lah pat ban dang shakri kaba kham bha lyngba kane ka seng.
Kitei ki nongïalam ka CoRP Ri-Bhoi Bhoi Sepngi bala pynskhem bad pynbam smai syndon mynta ka sngi ki kynthup ïa u Bah Sumar Lyngdoh ba la shah jied kum u President, Woster Thangkhiew Vice President, u Bah Runningwell Syngkli General Secretary, Jemfulstar Wahlang Finance secretary, u Bah Prison Makri Organising Secretary, u Bah Plomstar Mawblei Publicity Secretary lem bad kiwei kiwei.
Ïa kitei ki nongïalam ba thymmai ka CoRP Ri-Bhoi Sepngi la pynskhem bad pynbam smai da u Bah Pateng Myrsing President ka CoRP Sengkmie naka bynta ka samoi treikam u snem 2026-29 haka jingdonlang u bah Markus Makri General Secretary, u Bah Gershome Hat Vice President, haka jingïalang kaba la long ha Patharkhmah, ki nongïalam Hima bad nongïalam na kiwei kiwei ki seng.