ïano ka NPP kan phah sha Rajya Sabha napdeng u Bah Hamlet, Bah Hima bad James Sangma

Shillong, Jymmang 31 : Ka National People’s Party (NPP) kan sa shong jingïalang mynta ka taiew ban shim rai ïa u kyrtong u ban ïakhun ïa ka elekshon MP-Rajya Sabha, kaba la buh ban long ha ka 18 tarik Jylliew.
Kat kum ka khubor ba ïajan bad ka NPP, lai ngut ki kyrtong ki la paw hapoh ka party kum ki kyrtong kiba biang ban phah sha Rajya Sabha bad baroh lai ngut ki dei ki MLA barim, kiba shah rem noh ha ka elekshon MLA 2023.
Kine ki lai ngut ki dei u Bah Hamlet Dohling, MLA barim ka Mylliem, Bah Himalaya M Shangpliang, MLA barim ka Mawsynram bad u James PK Sangma, MLA barim ka Dadenggre constituency. Napdeng kine lai kat haduh ba thoh ïa ka khubor uba kham paw bad uba lah ban ïoh long kum u kyrtong jongka NPP un dei u bah Hamlet Dohling.Ka NPP ka don por satang kane ka taiew ban pynskhem ïa u kyrtong hashuwa ka jingleit thep kyrteng ka ban kut ha ka 8 tarik Jylliew.
Ka Election Commission of India ka la pyntip ba ka sngi khatduh ban thep kyrteng ki kyrtong ka dei 8 tarik Jylliew, ka jingbishar ïa ki kyrteng kan long ha ka 9 tarik Jylliew bad ka sngi ba khatduh ban weng ïa ka kyrteng ka long 11 tarik Jylliew. Ka sngi ban thep vote kan long ha ka 18 tarik Jylliew naduh ka por 9 baje mynstep haduh ka por 4 baje janmiet. Ka jingñiew ïa ki vote kan long hi hakajuh ka sngi naduh ka por 5 baje janmiet.
Kumban shu kdew, u Dr WR Kharlukhi, MP ba mynta sha Rajya Sabha, kaba ka samoi treikam jong u kan kut noh ha ka 21 tarik Jylliew, 2026, ula pynpaw ba um don jingthmu shuh ban mihkhmat sa shi samoi.