Pynrung noh ïa ka Bormanik College ha ka People’s College Grant, kyrpad ki bor pynïaid na u Dy.CM

Shillong, Jymmang 31: Ki bor pynïaid jong ka Bormanik College kaba dei kawei na ki College kaba pdiang lut ïa ki samla pule kiba wan na kylleng ki bynta jong ka Upper Shillong bad ter ter shaduh ki bynta ba sharum, ha ka sngi Thohdieng ki la kyrpad ïa ka sorkar jylla ba kan pynrung noh ïa katei ka jaka pule ha ka People’s College Grant.
Ïa kane ka jingkyrpad ka College ka la pynsngew ha u Symbud Myntri Rangbah ka Jylla, Bah Prestone Tynsong ha ka jingleit jngoh jong u ïa katei ka jaka pule ha ka sngi Thohdieng ba la dep ha ryngkat ka jingdonlang u Bah Daniel Thangkhiew, Bah Hamlet Dohling MLA barim, ka Principal Kong D Rumnong, ki Nongsynshar Shnong ka Upper Shillong bad kiwei kiwei.
Ha ka jingïalang kaba lyngkot, ka College ka la aiti ruh da ka dorkhas ha u Symbud Myntri Rangbah ban pynsngew ha u ïa ki jingdonkam jong katei ka College.
Ka Principal haba kren bad ki lad pathai khubor ka la ïathuh ba ka Bormanik College kadei ka jaka pule kaba pdiang lut ïa ki samla pule na kylleng ki bynta jongka Upper Shillong bad wat na ki bynta ba kham sharum ruh kumjuh.
“Mynta ngi don 346 ngut ki khynnah bad kumba 30ngut ei ei ki nonghikai bad ki nongïarap ha kane ka college,” ka la ong.
Haba ïadei pat bad ka jingïakren bad u Symbud Myntri Rangbah ka la ïathuh ba ki don ka jingkyrmen ba ka jingdawa ba ki buh kan seisoh. “Ngi don ka jingkyrmen kaba skhem ba ka kam kan long kaba seisoh namar na ka liang i Symbud Myntri Rangbah i la kular ban shimkhia ïa ka jingkyrpad jongngi,” ong ka Principal.
La pynpaw ruh ba kumba 90 persen na kin samla pule kiba wan ha katei ka college ki dei na ki longiing kiba duk bad kumta ka kylla long ka shlem kaba ai jingkyrmen ïa ki ba kin lah ban pyndep kham shajrong ha ki jingpule wat hapdeng bun ki jingeh.