Hadien ka jingtwa khyndew ha Borbhuin, khang u DC ïa ka bynta shadien jong ka Gorkha Nepali S.S.

Nongpoh, Naitung 29: Ki bor district jong ka Ri-Bhoi ki la hukum ban khang noh mardor ïa ka bynta shadien jong ka Gorkha Nepali Secondary School kaba don ha shnong Borbhuin, hadien ba ka jingtwa khyndew kaba jur ha ka 20 tarik Naitung 2026 ka la wanrah ka jingjulor ïa ka surok bad ka buh jingma ïa ka jingshngaiñ jong ki khynnah pule, ki nonghikai, bad ki nongtrei.
Ïa kane ka hukum la pynmih da u Deputy Commissioner bad Chairman jong ka District Disaster Management Authority (DDMA), Dr. Abhishek Saini, da kaba pyndonkam ïa ki bor ba la ai ha ka Disaster Management Act, 2005, hadien ka jingjurip kaba bñiah ïa ka skul bad ka jaka ba shah ktah.
Katkum ka hukum, ka bynta shadien jong ka iing skul ka long kaba ma namar ka jingktah jong ka jingtwa khyndew bad ka jingbteng jong u slap uba jur, kaba lah ban wanrah biang ka jingtwa khyndew ha kano kano ka por.
Namarkata, la hukum ba ka bynta shadien jong ka skul kan khang shuwa haduh ban da pynmih da kawei pat ka hukum, bad ym shah satia ïa uno uno ban rung sha katei ka bynta kaba la shah ktah. Hynrei, ïa kiwei pat ki bynta jong ka skul yn dang lah ban pyndonkam na ka bynta ka jingpule bad ki kam jong ka skul.La bthah ruh ïaki bor pyniaid katei ka skul ba kin kerkut bha ïa ka bynta kaba shah khang, ban buh ïa ki dak maham bad ban pyntikna ba ym don mano mano kiba rung sha katei ka jaka.
Shuh shuh, la kyntu ïa ki nongshong shnong kiba sah ha ki thaiñ Nongkylla Khasi bad Borbhuin, kiba don hajan ka jaka ba la twa khyndew, ba kin long kiba husiar bad lada donkam kin mih noh na ki jaka kiba don jingma bad leit sah sha ki jaka kiba kham shngaiñ tad haduh ba ki bor district kin pynbna ba katei ka jaka kala long shngaiñ.
Hakajuh ka por naka liang u DC u la khang ruh ïaki paidbah ban ïaid haki bynta jong u surok Nongpoh-Umden-Sonapur haki bynta jong ka skhim PMGSY-III kaba naduh 34.380km haduh 34.410 bad la bthah ïaki kali ban ïaid noh lyngba ka surok ban mih sha 20 mer namar ka jingma naka jingtwa khyndew tad haduh ban da lah ban pynkhuid bad weng ïaki khyndew ba twa ha surok.