Nongpoh, Nailar 03: Hadien ba la bun snem ka jingshakri sha ki paidbah ka Ri Bhoi bad ruh ba la don ka jingdawa ban pynthymmai noh ïa ki nongtreikam, ka seng HNYF sengkmie hadien ba ka la ai por ban ïa pynbeit ïa kane ka kam sha ki nongïalam ka District bad mynta ka sngi ka la lah ban pynlong ïa ka jingjied ïa ki nongïalam ba thymmai kiba dei shuwa tang ki nongïalam ba kham hakhmat ka seng.
Ïa kine ki nongïalam ba thymmai ka seng la jied mynta ka sngi ha ka jingïalang kaba la long ha Dorbar Hall, Sajer Nongpoh, ha kaba u President ba rangbah ka seng, u Bah Sadon Blah u la don lang ban sakhi ïa ka jingjied ïa kine ki nongïalam ba hakhamt ka seng lyngba ka jingïathep vote. U Bah Marcus Marten u President barim ruh u la don lang ha kane ka sngi bad u khlem ïa khun shuh ïa kane ka post President.
Kine ki nongïalam ba hakhmat ba la jied mynta ka sngi ki kynthup ïa ka Post President ba la jied ïa u Bah Heasting Lyngdoh, General Secretary ïa u Bah Alfred Mallai bad ïa ka post Vice President la jied ïa u Bah Edlebert Nongrum, uba dei u Secretary barim ka seng.
Kiwei kiwei ki nongïalam ka seng kan sa jied pat kham hadien ha ryngkat ka jingpynskhem ïa kine ki nongïalam ba thymmai ba la jied mynta ka sngi, na ka bynta ba kin shim ïa ka lyngkor nongïalam ban kit ban bah ïa ki kam ka seng na ka bynta ban shakri ïa ki paidbah ka them Ri Bhoi.
Haba ai jingkren ha kane ka sngi naduh u Bah Sadon Blah kum u President ba rangbah ka seng HNYF, u Bah Heasting Lyngodh kum u President ba thymmai ka HNYF Northern Region bad u Bah Alfred Mallai kum u General Secretary, ki la pynpaw ba ka thong kaba khakhmat eh ba la jied ïa kine ki nongïalam ka seng, ka long ban dang pynjanai shuh shuh ïa ka jingshakri na ka bynta ki paradoh ki parasnam hapoh ka dong ka thain Ri Bhoi.
Ki khot ki wer ruh ïa baroh ki para dkhot ne nongïalam hapoh ka seng ba kin ai ïa kata ka jingïatrei lang na ka bynta ban shakri ïa ka eh ka shon ki paidbah bad ki khmih lynti ruh ba da ka jingjied ïa ki nongïalam ba thymmai ka seng kan dang lah ban pynïaid ïa ka jingshakri khnang ban ioh jingmyntoi ka imlang ka sahlang hapoh ka dong Ri Bhoi.
Shuh shuh, ha kane ka sngi na ka liang u Bah Sadon Blah kum u president ba rangbah ka seng, u la kyntu ruh ïa kne ki nongïalam ba thymmai ba ki hap ban dang pynkhlain shuh shuh ïa ka jingshakri bad ka thong kaba kham hakhmat eh ka long ba kin ai kata ka jingaida ïa ki paradoh ki parasnam bad khamtam ba ki paradoh ki parasnam kin ioh shisha ïa kata ka jingmyntoi lyngba ka jingdon kine ki noingïalam ba la bynshed da ka seng ban kit ban bah ïa ka eh ka shon jong ki paradoh ki parsnam hapoh ka dong Ri Bhoi, u la bynrap.
