Hadien ba shah kyndang haka Assam, buh dukan ki bar jylla sa sha Meghalaya, beh krad ka FKJGP

Nongpoh, Nailur 07: Tang hadien shi sngi ba ki bor jong ka sorkar Assam kila kyndang bad jynrat naphang ïaki iing bad dukan ba shna beaiñ harud surok bah National Highway haka thaiñ 15 mer jong ka jylla Assam, mynta ka sngi kila mih katto katne ki dukan thymmai bala wan ban shong beaiñ da ki briew bym ithuh ithaw haka thaiñ 15 mer ha u pud u sam ka jylla Meghalaya.
Halor katei ka jingwan shong dukan ki bar jylla ha u pud u sam ka jylla Meghalaya hadien ba shah kyndang haka sorkar Assam naka liang ka seng FKJGP North Khasi Hills District bad Byrnihat Circle mynta ka sngi kila leit ban beh krad bad phah khang lut ïa baroh ki dukan bym ithuh ithaw kiba la wan ban shong ha ka thaiñ 15 mer ha u pud u sam ka jylla Meghalaya bad maham ruh ba kitei ki bar jylla ba shah kyndang na Assam kim dei ban wan rieh tngen sha Meghalaya bad ban shong dukan beaiñ kat haba lap ba shem.
Haba kren sha ki lad pathai khubor naka liang u Samla Kitborlang Suting Organising Secretary ka FKJGP Byrnihat Circle haka jingsynran lang u Bah Lumlang Mawnai Senior Vice president ka FKJGP North Khasi Hills District lem bad ki dkhot u la ong ba kum ka seng naduh hynnin ka sngi ba kyndang ka sorkar Assam kala dep ban maham ba ki bar jylla kim dei ban wan rieh tngen sha ka jylla Meghalaya kumba katei ka jaka ba shah kyndang ka don mar syndah bad ka Meghalaya.
Hynrei mynta ka sngi la iohi ba la mih ki dukan thymmai bym ithuh ithaw bala shong da ki bar jylla sha ka liang ka jylla Meghalaya, dei halor katei ka Nongrim kum ka seng kala shim ïaka sienjam ban beh krad ïakitei ki bar jylla ba kim dei ban wan buh dukan beaiñ sa sha u pud u sam ka jylla Meghalaya bad maham ruh ïaki nongshong shnong ki Rangbah Shnong ba kin long peitngor bad ba ym dei ban ailed ïa kitei ki bar jylla ban wan rieh tngen sha ka jylla Meghalaya.