Nongstoiñ, Nailur 06: Ka kam rep synsar ka dei kaba ai jingmyntoi ïa ki paitbah nongshong shnong, hynrei haba phai ha kawei pat ka liang, ka dei kaba ktah haduh katta katta ïa ki khlaw ki btap bad ki tyllong um.
Ha West Khasi Hills ka jingsdang jong ki paitbah nongshong shnong ban rep synsar kam pat da slem. Ka jingsdang ba malu mala ka dei san snem hadien jong ka jingshah khang pom dieng ha ka Supreme Court ba don burom ha ka 12 tarik jong u bnai Nohprah jong u snem 1996.
Dei ha kitei ki snem ba ki nongshong shnong ha West Khasi Hills ki la mad ïa ka jingkyrduh kaba shyrkhei bha, ha kaba tang ban thied khaw ruh kiba bun ba lang khamtam eh ha ki shnong kyndong kim ïoh shuh wat tang ïa u khaw ban bam ruh.
Ki khynnah kiba leit pule bun ki la sangeh noh, namar ki hap ban durut ha ka trei lyngkha bad ha kitei ki snem ym don shuh wat kawei ka pynthor kba kaba sah shrah hynrei baroh ki la kylla long ki jaka rep kba. Nalor kata ki khlaw ki btap ki la synlen lut na ka jingpom shyrti na ka bynta ban rep riew hadem, rep krai bad kiwei kiwei.
Hadien katto katne snem, mih pyrthei sa ka ïew synsar bad ka dor ruh ha kitei ki snem ka dang ïaid kumba khatsan haduh arphew tyngka shi kilo. Dei naduh kitei ki por ba ka jingrep synsar ka la sdang ha man la ki jaka hapoh ka district, ha kaba ki paitbah nongshong shnong ki la sdang ban ïabeh ha ka kam rep synsar bad hadien ba ki la dep pom shyrti ïa ki khlaw ki thung noh da u synsar.
Nalor kata ha ki snem ba la dep watla ïa u synsar dang kheiñ ba u dei u mar khlaw ruh, hynrei namar ka dor ïew ka biang ki nongrep ki ïabeh bha namar ban rep ruh ka surk ban ïoh symbai ruh ka suk.
Ha kine ki snem lei lei naduh ba u bah Himalaya M.Shangpliang MLA barim ka Mawsynram u la pynsngew sha ka sorkar ba kan ithuh noh ïa u synsar kum u mar rep ki paitbah ki la nang ïabeh shuh shuh ban rep kham bun.
Kumta katba nang mih ki snem ka kam rep synsar ka la nang bun bad kat haduh kine ki sngi, lajan marshiteng ki bynta jong ka West Khasi Hills ki la dap tang da ki jaka rep synsar suda katba ki khlaw bad ki dieng ki siej ki la nang duna, ki umpohliew ki la nang duh, ki mrad ki mreng, ki sim ki doh ki la nang duh jait namar kim ïoh bam shuh.
Ha kaba ïadei bad kane ka mat ym shym pat don ki riew shemphang ne ki stad wad bniah ha kaba ïadei bad ka jingkylla jong ka mariang, ki ban pynsngew sha ki bor sorkar ba kin thaw ki lad ki lynti ban pynim ja ïa ki nongrep synsar. Ym don ruh ki ban pynsngewthuh ïa ki nongrep, ba ki dei ban pynduna ban rep synsar bad sdang ban thung da kiwei pat ki jingthung kiba ïadei kat kum ki jaka.
Ha kaba ïadei bad ka jingsdang duh jait jong ki mard ki mreng, ki sim ki doh, kiba bun ki jingkynnoh ki mih ba ka dei na ka jingpynïap pathar jong ki briew. Hynrei katei ka jingkynnoh kam lah ban long, namar ki nongsiat mrad kim ju siat kai ïa ki shrieh ki tngaw ne ki huleng lait noh ïa ki skei, ki syiar khlaw bad kiwei kiwei ki mrad kiba bang ban bam doh.
Watla katta ruh kin ym lah ban pynïap pathar kat haduh ba kin da duh jait syndon, hynrei ka jingsdang duh jait jong ki, ka dei namar ki hap ban phet sha kiwei pat ki jaka kiba ki ïoh pahuh ka bam namar ka jingrben jong ki khlaw ki btap.
Ka jingduh noh jong ki khlaw ym tang ki mrad kiba im ha ryngkew kiba sdang ban duh jait, hynrei wat ki dohkha doh pnat ruh kim juh shuh ban shong, lada ïa ki khlaw kiba don ha shi lynter ki wah, la pom bad pynsynlen lut, namar ki jingbam ba kongsan jong ki doh kha doh pnat, ki sher syngkai, ki dohthli doh tham bad ki shalynnai ha ki wah ki wah, ki dei ki khñiang kiba hap na ki sla dieng haba beh ka lyer, ki thabalieh khamtam kito ki thabalieh kiba her mynmiet, ki kynja skaiñ, ki soh jong kiba bun jait ki dieng kiba hap bad kiba shah rong ha ka um.
