Shillong, Nailur 07: Ka khubor ba la ïoh na ki pulit la ïathuh ba ka Saralin Umdor ka la phah ka jingujor ba ha ka 3 tarik mynta u bnai ha ka por nohphai sngi, ka la lap ba ki runar bym lah ban ithuh ki la prong hapoh ka ïing shongwai jong ka kaba ha Mawlai Phudmuri, Shillong bad ki la tuh kawei ka LPG cylinder bad kawei ka gas connection card.
Ha kawei pat ka jingjia u Ravi Biswakarma u la phah ka jingujor ba hapdeng ki mied jong ka 2 bad 3 tarik mynta u bnai, ki runar bym lah ban ithuh ki la tuh ïa ka thuk thuk jong u kaba don u nombar ML-05S-5151 napoh ka compound jong u kaba ha Forest Colony, Polo, Shillong.
Sa kawei pat ka jingjia ki pulit ki la ïathuh ba ka kong Leehana Marbañiang ka la phah ka jingujor ba ha ka 28 tarik u Nailar, 2024 ha ka por kumba 1baje nohphai sngi, ka la lap ba ki runar bym lah ban ithuh ki la pom ïa ki dieng bad ki la rah ruh shibun ki dieng kiba shongdor kumba T. 6 lak na ka jaka kaba la long trai da ka kmie jong kaba ha Langkyrding, Mihngi Block-II, Shillong, khlem ka jingmynjur jong ka.
Ha kawei pat ka liang ki pulit ki la ïathuh ba u Bah Rajat Dhar u la phah ka jingujor ba ha ka 2 tarik mynta u bnai, ki runar bym lah ban ithuh ki la prong hapoh ka ïing jong u kaba ha New Kench’s Trace, Shillong bad ki tuh ïa ki jingdeng mawkordor (jewellery) kiba shongdor kumba T. 10 lak bad ki la tuh ruh ïa ka pisa kumba T. 10,000/-.
