Hadien 7 snem wanphai ka India kum ka lahduh ha ka SAFF Women’s C’ship

MARGAO (GOA), Jylliew 06: Ka India ka la ïoh ban khur biang ïa ka nam lahduh jong ka SAFF Women’s Championship hadien hynñiew snem, da kaba pynliem ïa ka Bangladesh kaba bat ïa ka nam lahduh, da 3-1 kol ha ka phainal kaba itynnad bha ha Margao, Goa, ha ka janmiet sngi Saitjaiñ.
Ka Bangladesh ka la rung sha kane ka jingïalehkai kum ka kynhun kaba bat ïa ka nam lahduh, katba ka India ka dang ïakhun ban ïohrah biang ïa ka khusnam kaba la kim shym la lah ban pynurlong ha ki ar tylli ki sienjam ba la dep.
Ka Pyari Xaxa ka la pynlamkhmat ïa ka India ha ka minit kaba 42 shuwa ba ka Ritu Porna Chakma (45+1’) kan pynïakhaid ha ki minit pynjlan ba khatduh ban jam sha ka por shongthait da mar 1-1 kol. Ka Sanfida Nongrum ka la buh biang hakhmat ïa ka India tang hadien 40 sekhon ba la ïaid ka kylla miet, nangta ka Lynda Kom Serto (82’) ka la bynrap ïa ka kol kaba lai ban pynskhem ïa ka jingjop ha kaba ka India ka la rah ïa ka nam lahduh ha ka rekod kaba hynriew sien.
Ka Sanfida, kaba la pynkhihjar ruh ha ka semifinal, ka la shah jied ban khur ïa ka khusnam Most Valuable Player jong kane ka lympung.
Katba ka jingsawa kaba khatduh ka dang sawa, ka jingkmen kaba ym shuh ban batai ka la paw ha ka kynhun India. Ka Sanfida Nongrum, kaba la don ka bynta kaba radbah ha baroh kawei ka lympung, ha kaba ka la thep kol ha baroh ar tylli ki jingïakhun semi-final bad final, ka la dem khrup ha ki khohsiew shuwa ban leit kdup ïa ka paralok ka Dangmei Grace, kaba la pynbna ba kan shongthait noh hadien ba la wai ka jingïalehkai.
Da kane ka namjop ka India ka la wanphai biang sha khlieh duh jong ka phutbol ki kynthei South Asia ha ka sien kaba nyngkong naduh u snem 2019. Ka Grace, ka nongïalehkai ba la rangbah jong ka kynhun ki kynthei ka India, ka la mihkhmat ïa ka ri 95 sien naduh ba ka la ïalehkai nyngkong ha u snem 2013, bad ka la pynkut ïa ka jingïalehkai bar ri jong ka da kaba jop ïa ka khusnam lahduh kaba lai ha ka SAFF.
Kane ka jingjop ka la pynkut ïa ka jingïalehkai ba kyrpang na ka bynta ka kynhun India, kaba pynlong ïa kane ka lympung mynta u snem, ha kaba ka la jop ïa baroh saw tylli ki jingïalehkai, da kaba thep 18 kol bad shah thep tang kawei, katba ka la pynkut ruh ïa ka jingkyrmen jong ka Bangladesh ban khur ïa ka nam lahduh kaba lai sien lynter.
Baroh ki khusnam shimet la khur da ki thei ïalehkai ka India, ha kaba ka Aveka Singh ka la pynkut ïa ka lympung kum ka nongthep kol ba bun tam (Top scorer) da 4 tylli ki kol, katba ka Sanfida Nongrum ïa ka khusnam Most Valuable Player, nangta ka Panthoi Chanu Elangbam ka la ïohpdiang ïa ka nam nongap-kol ba kynsai tam (Best Goalkeeper). Ka Nepal ka la khur ïa ka khusnam Fair Play award.
Ki thei ïalehkai ka India kiba la mih madan ha ka phainal: Panthoi Chanu Elangbam (GK), Nirmala Devi Phanjoubam, Shilky Devi Hemam, Juli Kishan, Sangita Basfore (C) (Soumya Guguloth 89′), Sanfida Nongrum, Astam Oraon, Pyari Xaxa (Grace Dangmei 86′), Manisha Kalyan (Lynda Kom Serto 71′), Jasoda Munda, Aveka Singh (Malavika 46′).