Nongpoh, Jymmang 13: Ban dang pynneh pynsah ïa ki riti ki dustur na ka niam ka rukom ba la ju hikai da ki longshuwa ki manshuwa bad kaba la duh la dam noh, ka Raid Nongtham ba hap ha ka Hima Khyrim ka la pynim biang hadien 40 snem ïa kawei na ka lehniam ne ka tamasa hapoh ka Raid Nongtham ba la tip kum ka ‘Shad Nohkjat’, ba la pynlong hynnin ka sngi ha u Lum Nongbah ka Raid Nongtham.
Ïa kane ka Shad Nohkjat la pynlong hapoh u Lum Nongbah ka Raid Nongtham, ha kaba la wan ban shim bynta da u Bah Kynjoh Rangtong, MDC ka Mawhati kum u kongsan bad la sakhi lang ruh da ka jingdon lang u Paiem Balajied Syiem, u Bah Shemphang Lyngdoh, uwei na u riew rangbah, u Paiem T. Syiem, Syiem ka Raid Nongtham, u Bah Shanlang Diengdoh, Vice President ka FKJGP na Ri Bhoi, ki longsan ki mansan bad ki khun ki hajar jong ka Raid.
Ïa kane ka tamasa Shad Nohkjat la pynphuh pynphieng ruh da ki jingshad tynrai bapher bapher jong ka Raid bad ryngkat ki jingrshad bad ka jingtem tynrai kiba la wan ban mihkhmat na ka Hima Khyrim, kiba la pynshohbiej ïa ki khun ki hajar kiba la wan shim bynta ha kane ka lehkmen shad Nohkjat ha u Lum Nongbah.
Haba ai jingkren ha kane ka sngi, naduh u Bah Kynjoh Rangtong, MDC ka Mawhati, u Paiem Balajied Syiem, u Bah Shemphang Lyngdoh bad u Syiem ka Raid Nongtham, u Paiem T. Syiem, ki la ban khia halor ka jingdonkam ban pynneh pynsah ïa la ki riti ki dustur.
La pynpaw ruh ba kane ka Shad Nohkjat ka la duh la dam mynta la kot sha ki 40 snem tam ha kaba bun na ki khun ki hajar ki la klet noh ïa kane ka shad Nohkjat, hynrei da kawei ka jingmut la pynim biang ïa kane ka Shad Nohkjat kaba long kum ka riti ka dustur bad ka kolshor jong ka Raid Nongtham.
Na ki nongkren ka sur kaba kham sawa, ka long ban kum ka jaid bynriew kam dei ban klet ïa la ka jong ka tynrai bad kane ka jingpynim biang ïa kane ka Shad Nohkjat ka long kawei na ka lynti kaba bha tam ha kaba kum ka Raid ka dang donkam ban pynneh pynsah ïa kane ka Shad Noh kjat ka ban long ka nongmuna ne ka riti ka dustur hapoh ka Raid.
